Жуырда аталмыш мектеп жанында жерлес батырға мүсін орнатылды. Мүсіннің авторы – сәулетші Эли Качуев. Салтанатты шараға батырдың туыстары мен қызы Клара Мартбекқызы Мамыраева, сонымен қатар қалалық мәслихат хатшысы Құдайберген Бексұлтанов, Октябрь ауданының әкімі Әлімжан Қанаев, ардагерлер кеңесінің төрағасы Марат Аймағамбетов қатысты.
Қ.Бексұлтанов мұндай іс-шаралардың ескерткіш жанында ұйымдастырылуы патриоттық тәрбие беруде өте маңызды екенін атап өтті. Айта кетейік, тұғырға қонған тұлға ерлік істерімен ел есінде қалған даңқты батыр. Ол 1908 жылы 2 наурызда №20 ауылда (қазіргі Қарқаралы ауданының Ақжол ауылында) дүниеге келген. 1942 жылы Ұлы Отан соғысына аттанады. Днепрді алуда танытқан әскери ерлігі үшін Мартбек Мамыраевқа КСРО Жоғары Кеңесі Президиумының Жарлығымен 1944 жылы 15 қаңтарда Кеңес Одағының Батыры атағы мен Ленин ордені және «Алтын Жұлдыз» медалі берілген. Кеңес әскерінің құрамынан демобилизацияланған соң Мартбек Мамыраев Киров атындағы шахтада партия ұйымын басқарды, одан кейін Қарағанды қаласының Ленин аудандық партия комитетінің бірінші хатшысы болды, кеншілер астанасы атқару комитеті төрағасының орынбасарлығына сайланды. Өмірінің соңғы кезінде ол химия-металлургия институтында еңбек етті.
Мирас АСАН, «Егемен Қазақстан»
Қарағанды облысы