Қостанайда №108-ші «Киев-Астана» жолаушылар пойызы жолаушысының үстінен қылмыстық іс қозғалды. Үстіміздегі жылдың маусым айында бірлескен кедендік-шекаралық бақылау жасалған кезде осы пойыздың 8-ші вагоны жолсерігінің демалыс купесіне жасырылған алтын-күміс әшекей бұйымдар табылған болатын. Оны Украинаның азаматы қаңылтыр қалталарға салып, жолсеріктің купесіндегі қуысқа байқалмайтындай етіп жасырған екен. Бірақ ол кеденшілер мен шекарашылардың қырағы көзінен таса қалмады. Сөйтіп, Астанаға жасырын бара жатқан бағалы тауардың Таран ауданындағы Тобыл стансасына келгенде жолы қырқылды.
Сарапшының қорытындысы айғақтағандай, зергер бұйымдардың басым көпшілігі күмістен жасалған. Алтын әшекейлер аз. Алайда, тәркіленген тауар құнды болып саналады, оның бағасы 7 875 000 теңгені құрайды. Астанаға алып бара жатқан осынша бағалы әрі аса көп мөлшердегі алтын-күміс әшекейлер саудаға түсер ме еді, әлде басқа мақсатқа жаратылу үшін алынды ма, әзір ол жағы белгісіз.
Енді арам жолмен байығысы келген пысықтың тағдырын әділ сот шешеді.
Нәзира ЖӘРІМБЕТОВА.
Қостанай.