Қуатты станса

Бүгінгі күннің басты талаптары инфрақұрылымдық жүйелердің тұтастығын қажет етеді. Айталық, жаңа тұрғын үйлер мен әлеуметтік- тұрмыстық және өндірістік нысандар бой көтерген кезде дүниенің бір рахаты іспеттес газды тұтыну жүйе­лерін қоса ойластырмаса ал­дың­ғы айтқанымыздың бәрі бос әңгіме болып шығады. Бір сөзбен айтқанда, көгілдір отын – өмір сүру сапасын көтерудің басты бір тетігі. Мұндай игі мақсатқа қол жеткізу үшін Ақтөбе аймағында ұлттық оператор «ҚазТрансГаз» АҚ ке­­шен­ді шараларды жүзеге асырып келеді. Осы арқылы ай­мақ­тағы елді мекендерді газбен жаб­дықтауға және газ тарату же­лілерін жаңғыртуға жаңаша көз­қарас қалыптасқан. Соның нә­ти­жесінде аталған іс тұтастай инвестициялық жоба деңгейіне көтерілген. Бұл бағытта Мемлекет басшысы Нұрсұлтан Назарбаевтың Ақтөбе облысына жұмыс сапары кезінде пайдалануға берілген автоматтандырылған газ тарату стансасының (АГТС) жөні бөлек, орны айрықша. Оның өнімділігі сағатына 300 мың текше метрді құрайды. Осы арада мұндай жобалық биік мөлшерді бұған дейін елімізде бірде-бір газ тарату стансасы ала алмағанын айтқан жөн. Мұның өзі аталған нысан елі­міздегі ең қуатты газ тарату стан­сасы екенін көрсетеді. 

Өткен сәрсенбінің сәтті кү­ні Елбасы осы өңірдегі зиялы қау­ым өкілдерімен кездесуі ке­зін­­де, Ақтөбенің елордамыз Астана, мегаполис қала – Алматы және елдің оңтүстігіндегі шырайлы шаһар Шымкент секілді ірі қала­лардың біріне айнала алу мүм­кіндігі бар екенін айтты. Осы орайда агломерациялық аймақ орталығы халқының санын келешек жылдарда миллионға дейін жеткізу көзделген. Осынау күр­делі де жауапты міндет өз ке­зегінде бірқатар стратегиялық ше­шімдерді қажет етеді. Соның ең басты шарттарының бірі тұр­ғындар саны жылдан жылға өсіп келе жатқанда заманауи қала­ны көгілдір отынмен толықтай қамту болып отыр. Бір сөзбен айт­қанда, қазіргі күні қаладағы ком­муналдық және өнідірістік ны­сандардың табиғи отынға деген қа­жеттілігін қанағаттандыру ісінде «ҚазТрансГаз» АҚ қарқынды да қа­рышты қадам жасады деуге толық негіз бар. 

Жүзеге асқан іс – бір жағынан, ұлттық оператордың Елбасы тапсырмасына сай қимыл-қарекет таныта білгенінің айғағы. Ақтөбе қаласы іргесінде Қазақстандағы ең қуатты АГТС-тің іске қосы­луы, біріншіден, газ тарату қу­атын одан әрі күшейтеді. Екі­н­­­шіден, газ тарату көлемі ай­тар­­лықтай өседі.

Үшіншіден, қол­да­ныстағы стансаларға түсіп келген салмақты әжептәуір азайтады. «ҚазМұнайГаз» ҰК» АҚ-тың аға вице-президенті Серді Ибулла Жұмағұлұлы газет тілшісіне осылай деп мәлімдеді. Тағы бір айта кетерлігі, құрылысты жүргізу барысында ұзындығы 32 шақырымды құ­рай­тын жаңа газ құбырлары тар­тыл­ған. Бұған қоса газ реттегіш екі қо­сын тұрғызылған. 

Аталған газ тарату станса­сы­ның ауқымы тек Ақтөбе қала­сы­мен шектелмейді. Оның күш-қауқары қала маңындағы елді мекендерді және Қобда, Мәртүк, Алға және Қарғалы аудандары аумағын көгілдір отынмен тұрақты түрде қамтуға жететіні де елеулі іс. Бұлай деудің өзі де аз. Тіпті жаңа стансаның қуаты қазіргі жұмыс істеп тұрған кәсіпорындарды ғана емес, сонымен бірге таяу жылдарда бой көтеретін нысандарды газбен қамтуға да жетеді екен. Мұндайда бәрекелді демегенде, не демекпіз!

Ең бастысы, қазіргі күні сер­пінді жобаның тұрғындарға тигізетін тұрмыстық жеңілдіктері мол. «АГТС 300» арқалайтын әлеуметтік жауапкершілік жоғары. Оның пайдалануға берілуі Ақтөбе өңі­рі­нің әлеуметтік-экономикалық тұрғыдан одан әрі дамуына белгілі бір деңгейде оң әсерін тигізгені де талассыз мәселе. Осы арқылы инвестициялық тартымдылықтың артқаны да бөлек бір тақырыптың еншісі. Дәл осы тұста соңғы екі жылда өңірді газбен қамту деңгейі алпыстан сексен жеті пайызға өскенін де айта кетудің реті келіп тұр. Ал жаңа қуатты стансаның іске қосылуы арқылы бұл дерек пен көрсеткіш деңгейі одан әрі өсе түсетініне де сенім мол. «Құтты қонақ келсе қой егіз табады» дегендей, қатардағы көп қонақтың бірі емес, қуатты станса пайдалануға берілген күні Мемлекет басшысы Нұрсұлтан Назарбаевтың Ақтөбеге жұмыс сапарымен келуінің де жағымды жағы мол демекпіз. 

Осы арқылы тағы да келешекке көз тігіп, бағдар белгілер болсақ. «ҚазТрансГаз» АҚ алдағы жылдарға арналған инвестициялық жобаларды жүзеге асыру кестесін белгілегенін айтпай кету мүмкін емес. Осы кестеге сәйкес ұлттық оператор өңір тұрғындарының 96 пайызын табиғи газбен қамтуды жоспарлап отыр. Сонымен бірге облыс аумағында газ құбырларын салу ісі де одан әрі жалғасады. Осы күнге дейін облыс аумағында 400 километрге жуық газ құбыры төселсе, газ мамандары алдағы уақытта тағы да 287 шақырым газ құбырын жүргізбек. 

Бүгінгі әңгімемізді түйіндей келе, автоматты газ тарату стансасы қала сыртындағы Жаңа Әлжан элеваторы маңында салынғанын айта кеткіміз келеді. Дәл осы жер­дің таңдалуы да тектен-тек емес екен. Өйткені дәл осы тұста «Жаңа жол-Ақтөбе» және «Бұқара-Орал» магистральды газ құбырлары тартылған. Яғни Ақтөбе облыстық әкімдігі оны қай жерден салу ке­рек­тігі жөнінде шешім қабылдар кез­де нысанның стратегиялық си­патын бірінші кезекке қойған сыңайлы. Өйткені өңірдегі бір біріне тәуелсіз бұған дейінгі қос қуат көзі магистральды газ құбыр­ла­рының бірінде апат бола қалған жағдайда да газ үздіксіз әрі тұрақты түрде тарала беретіні жаңа АГТС-тің стратегиялық рөлін айқындай түседі. 

Темір ҚҰСАЙЫН, «Егемен Қазақстан»

АҚТӨБЕ

Суретте: Жаңа автомат­тан­­дырыл­ған газ тарату стан­са­сының ашылу салтанаты