Өңірде 28194 мүмкіндігі шектеулі жан болса, 2 мыңнан астамы – балалар мен жасөспірімдер. Жуырда «Мейірімділік пен түсіністікке жол ашық» атты фестиваль барысында оларға жан-жақты құрмет көрсетілді.
11 аудан мен облыс орталығындағы 9 әлеуметтік мекеме қатысқан шарада сөйлеген сөзінде өңір басшысының орынбасары Асқар Сақыпкереев мүмкіндігі шектеулі адамдарға мемлекет пен қоғам тарапынан жан-жақты қамқорлық көрсетілетінін, оның бір мысалына биыл «Әлеуметтік жобалар байқауы ұйымдастырылғанын, оған жерлестеріміздің белсене атсалысқанын жеткізді. Олардың арасында тағдыр тәлкегіне ұшыраса да, жігері жасымаған, белгілі бір кәсіпті ұршықша үйіріп жүрген азаматтар көптеп саналады.
Мәселен, биыл еліміз бойынша өткізілген әлеуметтік жобалар байқауына қатысқан жерлесіміз Уәлихан Ыбыраев ынталандыру сыйлығына ие болды. 32 жастағы петропавлдық туабітті мүгедектер үшін арнайы жылжымалы монша жасап шығарған.
Шығармашылық фестиваль шеңберінде қала мен аудандардан келген қатысушылар өз өнерлерін ортаға салды. Әуелете ән шырқап, мың бұрала билеп, көрермендердің қошеметіне бөленді. Вокал, хореография, көркемсөз, аспапты және декоративті-қолданбалы шығармашылық аталымдар бойынша үздіктер анықталды. «Қазақ зағиптар қоғамының» облыстық филиалы, есту кемістігі бар балаларға арналған интернат үйі, Петропавл әлеуметтік қызмет көрсету балалар орталығы, тірек-қимыл аппараты зақымданғандарға арналған интернат үйі, Тайынша әлеуметтік қызмет көрсету орталығының өнерлі ұжымдары дипломдармен, бағалы сыйлықтармен марапатталды.
Сөз арасында есту қабілеті нашар балалардан құралған «Sensitive» балдық би ансамблі кеш шырайын аша түскенін, олардың халықаралық байқауларда Гран-при ұтып алғанын айта кеткен жөн. Сондай-ақ мүмкіндігі шектеулі балалар салған суреттер мен қолөнер туындылары көрмеге қойылды.
Шығармашылық фестиваль жас күйшілерді де тоғыстырды. «Үкілі домбыра» сайысы «Қазақстанның халық ағарту ісінің үздігі», ардақты ұстаз, дәулескер күйші Серікбай Құсайыновтың 80 жылдығына арналды. 16 мен 40 жас аралығындағы үміткерлер байқау шарты бойынша Серікбай Бәриұлының репертуарынан бір күй және атақты күйшілердің шығармасын орындады. Бас жүлде Жамбыл ауданының намысын қорғаған Ерболат Серікбайға бұйырды.
Өмір ЕСҚАЛИ,
«Егемен Қазақстан»
Солтүстік Қазақстан облысы
Суретті түсірген
Амангелді БЕКМҰРАТОВ