Орталық коммуникациялар қызметінде 19-20 қазан күндері Астанада өткізілетін жылжымайтын мүлік мәселелері бойынша Ортаазиялық форумға арналған баспасөз мәслихаты ұйымдастырылды.
Оған Астана қаласының Инвестициялар және даму министрлігінің басқарма басшысы Әлішер Әбдіқадыров, Астана қаласының сәулет және қала құрылысы басқарма басшысы Бақтыбай Тайталиев, «Астана Конвеншн Бюро» ЖШС директоры Санияр Әйтекенов, сондай-ақ «Kazakhstan Networking Partners» компаниясының басшысы Асхат Исабеков қатысты.
«2017 жылғы 19-20 қазан күндері Астанада CREW (Commercial Real Estate Week) коммерциялық жылжымайтын мүлік аптасы аясында Ортаазиялық «CRE Central Asia-2017» жылжымайтын мүлік мәселелері жөніндегі форум өткізіледі. Оның жұмысына Қытай, Сингапур, Ұлыбритания, Канада және басқа да елдерден сараптаушылар келеді деп күтілуде. Аталған шара Астана әкімдігінің қолдауымен Тәуелсіздік сарайында өткізіліп, коммерциялық жылжымайтын мүлік нарығының дамуымен байланысты көкейкесті мәселелерін шешуге бағытталған. Форумның басты шарасы ретінде Астана қаласының әкімі Әсет Исекешевтің шақыруымен келетін Орталық Азия елдері мен ТМД елдерінің Алматы, Шымкент, Ашхабад, Тбилиси, Ташкент, Бішкек секілді қалалар басшыларының кездесуі орын алады.
Сонымен қатар форум аясында салалық көрме өтеді. Бұл көрмеге қатысу үшін Қазақстанның аймақтарынан инфрақұрылымды сол жерлерде дамытып жатқан құрылыс, жобалау және сәулет компаниялары, сондай-ақ халықаралық өздерінің тәжірибесі мен серпінді жобалары бар, логистика және өнеркәсіптік жылжымайтын мүлікпен айналысатын компаниялар, жүзеге асыруға жататын қойма, өнеркәсіптік нысандары шақырылған.
Ұлттық және шетелдік бұқаралық ақпарат құралдарының қатысуымен форум әртүрлі номинациялар бойынша жылжымайтын мүлік саласындағы «Commercial Real Estate Awards-2017» жыл сайынғы кәсіби жүлдесін марапаттауымен аяқталады.
Рауан ҚАЙДАР,
«Егемен Қазақстан»