27 қазан күні Қазақ мемлекеттік қыздар педагогикалық университетінде «Білім мен ғылым дамуының химия, биология, экология және география бойынша заманауи бағыттары» атты Халықаралық ғылыми-практикалық конференция өтеді. Бұл туралы оқу орнының Медиа орталығы хабарлады.
Шараның мақсаты – Мемлекет басшысы Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласындағы бастамаларды іске асыру аясында жастарға рухани тәрбие беретін игілікті шараларды ұйымдастыра отырып, отандық ғалымдардың ұлағатты істерін өскелең ұрпаққа насихаттау.
Алқалы жиынға отандық және шетелдік ғалымдар мен жоғары оқу орындарының қызметкерлері қатысады.
Конференция жаратылыстану ғылымдарының бірнеше секциялары бойынша ұйымдастырылады. Жиын барысында қазақстандық ізденушілердің ғылыми еңбектерінің көрмесін өткізу, беделді ғалымдардың студенттерге арналған шеберлік сыныптарын жүргізу жоспарланған.
– Рухани жаңғыру – бұл адам сана-сезімінің, сенімі мен сапасының, білімі мен өмір сүру тәсілінің көрсеткіші. Қоғамдық сананы жаңғыртудың басты факторы – сапалы білім, бәсекеге қабілеттілік. Осы орайда қазақстандық ғалымдардың шығармашылық, ғылыми-зерттеу жұмыстарын насихаттау мен оны кең көлемде жариялауда, жастарды жобалық зерттеу іс-әрекеттеріне тартуда және білім беру үрдісінің тиімділігін көтеру мен қолданбалы ғылымға деген қызығушылықтарын дамытуда осы тақілеттес жиындардың маңызы зор, – деп атап өтті шара ұйымдастырушылары.
Конференцияға келіп түскен материалдар негізінде арнайы жинақ шығару көзделіп отыр. Бұл өз кезегінде еліміздегі ізденуші жастарға, ғылыми жұмыстармен айналысатын ғалымдар үшін маңызды теориялық және әдістемелік көмекші құралы болмақ.