«Локомотив құрастыру зауыты» АҚ 100-ші тепловозды құрастырып шығарды. Отандық локомотив шығару үдемелі индустриялық-инновациялық даму бағдарламасы аясында жүзеге асырылуда. «ҚТЖ» ҰК» АҚ-тың еншілес кәсіпорны «Локомотив құрастыру зауыты» АҚ еліміздегі ауыр машина жасау саласының қарлығашы болып табылады.
Нөмірі 0100-ші тепловоз 18 түрлі сынақтан сүрінбей өтті. Енді оған «Қазақстан темір жолы» ұлттық компаниясы» АҚ-тың елу шақырымдық магистральдық желісінде сынақтан өту қалды. Бұл сынақтан да сүрінбей өтсе, Ақтоғай стансасының локомотив пайдалану депосының паркі құрамына кіреді. Сөйтіп, Ақтоғай – Семей бағытында жүк пойызын алып жүретін болады.
Қазақстандағы ауыр машина жасау саласының тұңғышы «ҚТЖ» ҰК» АҚ-тың еншілес кәсіпорны «Локомотив құрастыру зауыты» АҚ 2009 жылғы шілденің 3-інде іске қосылған болатын. Елімізде алғашқы локомотивті құрастыру бес айдан астам уақытты алған болса, қазір зауыт қабырғасынан айына ТЭЗЗА үлгісіндегі жүк локомотивінің 6-8-і шығарылады. Мұндай көрсеткішті тұрақты ұстап тұру үшін зауыт еңбеккерлері үш ауысымда тәулік бойы тер төгеді.
Бүгінде кәсіпорында отандық темір жол көлігі машинасын шығарып қана қоймай, қазақстандық өнім түрлерін де көбірек тартуға ден қойылуда. Мұнда қарашаның ортасына қарай отандық өнімді игерудің екінші кезеңіне көшпек. Осылайша қазақстандық тауарлар мен қызмет түрлерін сатып алу көрсеткіші 2012 жылдың үшінші тоқсанына дейін 32 пайызға жеткізілмек.
Әбдірахман ҚЫДЫРБЕК,
Астана.