Ел өмірінің қарыштап дамуы үшін экономикалық және әлеуметтік жетістіктер ғана емес, сонымен бірге мәдениет пен өнердің өркениет талабына сай өркендеуі де ерекше орын алады.
Елімізде мәдениет пен өнерді дамыту жолында көптеген игі істер атқарылып келеді. Осы сөзіміздің бір мысалы ретінде, жақында Тараз қаласынан ашылған Мәдениет және өнер колледжін айтсақ та болады. Ойлап қарасақ, өнер қуған жастар үшін айрықша оқиғаға айналған осы бір қуаныштың өзіндік тарихи себеп-салдары да бар сияқты. Өйткені, Жамбыл облысының тұрғындары мақтаныш тұтатын дәстүрлі өнердің атақты өкілдері Жамбыл, Кенен, Ықылас, Ұлбике, Сауытбек сияқты тағы басқа да өнер саңлақтарының мәдени мұралары бір өңірдің ғана емес, бүкіл еліміздің рухани байлығы болып саналады.
Облыс әкімдігі соңғы бір-екі жылдың ішінде мәдениет саласына жан-жақты қамқорлық жасап, оны заман талабына сай жаңғыртып, дамытуға үлкен көңіл бөліп отыр. Биыл облыста ұлттық-аспаптар оркестрі тұсауын кесті. Ұлттық-фольклорлық ансамбльдің негізі қаланды. Аудандарда халық театрларының жұмысын жандандыру қолға алынды. Мәдениет пен өнерді өркендететін түрлі фестивальдар, байқаулар, конкурстар өткізілуде. Әртістер мен әншілердің кәсіби шеберлігін арттыру үшін мақсатты жұмыстар жүргізілуде.
Жаңадан ашылған Мәдениет және өнер колледжі – көпшіліктің қалауымен, Білім және ғылым министрлігінің және облыс әкімдігінің қолдауымен ашылып отыр. Жамбыл облысының әкімдігі бұдан былай осы оқу орнында жас таланттарды арнайы грантпен оқытатын болады. Биыл колледжге қабылданған 80 қыз пен жігітке арнайы грант бөлінді. Соның арқасында ауылдан арман қуып келген жас таланттар және Тараз қаласының өнерге бейім түлектері оқуға қабылданды. Жаңа оқу орнында, сондай-ақ көрші облыстардан келген білім алушылар да бар.
Колледжде жастардың сапалы білім мен саналы тәрбие алып, шығармашылық қабілетін шыңдауына барлық қажетті жағдай жасалған. Онда білікті өнер мамандары сабақ береді. Өйткені, болашақ өнер иелерін тәрбиелеу қоғам үшін жауапкершілігі аса зор іс.
Көсемәлі СӘТТІБАЙҰЛЫ.
Жамбыл облысы.