Кеше Қайрат Мәмидің төрағалық етуімен болған Парламент Сенаты Бюросының отырысында Парламент Мәжілісінде мақұлданған заң жобалары комитеттер мен Сенат Аппаратына берілді, деп хабарлады палатаның баспасөз қызметі.
Отырыста Азиядағы өзара іс-қимыл және сенім шаралары жөніндегі кеңес Хатшылығының, оның персоналының және Кеңеске мүше мемлекеттер өкілдерінің артықшылықтары мен иммунитеттері туралы конвенцияны, 1992 жылғы 15 мамырдағы Ұжымдық қауіпсіздік туралы шартқа өзгерістер енгізу туралы хаттаманы, 2002 жылғы 7 қазандағы Ұжымдық қауіпсіздік туралы шарт ұйымының Жарғысына өзгерістер енгізу туралы хаттаманы, Қазақстан мен Беларусь арасындағы Азаматтық қорғаныс, төтенше жағдайлардың алдын алу және оларды жою саласындағы ынтымақтастық туралы үкіметаралық келісімді ратификациялау туралы заң жобалары одан әрі зерделеу үшін Халықаралық қатынастар, қорғаныс және қауіпсіздік комитетіне берілді.
Қазақстан мен Сербия арасындағы еркін сауда туралы үкіметаралық келісімді ратификациялау туралы, «Ғарыш қызметі туралы», «Қазақстан Республикасының кейбір заңнамалық актілеріне ғарыш қызметі мәселелері бойынша өзгерістер мен толықтырулар енгізу туралы», «Газ және газбен жабдықтау туралы» және «Қазақстан Республикасының кейбір заңнамалық актілеріне газ және газбен жабдықтау мәселелері бойынша өзгерістер мен толықтырулар енгізу туралы» заң жобалары бойынша бас комитет болып Экономикалық және өңірлік саясат комитеті белгіленді.
Заңнама және құқықтық мәселелер комитеті «Қазақстан Республикасы мемлекеттік тәуелсіздігінің жиырма жылдығына байланысты рақымшылық жасау туралы», еліміздің кейбір заңнамалық актілеріне адвокатура мәселелері бойынша өзгерістер мен толықтырулар енгізу туралы және «Мемлекеттік құқықтық статистика және арнайы есепке алу туралы» Қазақстан Республикасының Заңына өзгерістер мен толықтырулар енгізу туралы» заң жобалары бойынша негізгі комитет болып белгіленді.