Атырау қаласында болған жарылыс фактілері бойынша қылмыстық істі тергеу барысында 4 адамнан құрылған қылмыстық топ анықталып, залалсыздандырылды. Олар қолдан жасалған жарылғыш құрылғыларды құқық қорғау және мемлекеттік орган қызметкерлерін қорқыту мақсатында заңсыз дайындаған және Атырау облыстық әкімдігі мен прокуратурасы ғимараттарының жанында жарылыс жасауды жоспарлаған. Алайда, жарылғыш техника саласындағы білімнің жеткіліксіздігінен және қолдан жасалған қондырғыны дұрыс пайдаланбау салдарынан қылмыстық топтың бір мүшесі Б.Сұлтанғалиевтің өзі оқиға болған жерде қаза тапты. Қазіргі уақытта қылмыстық топтың қалған мүшелері тұтқындалды және жасаған қылмыстарын мойындап жауап беруде. Тергеу әлі жалғасуда, деп хабарлады Атырау облысы прокуратурасының баспасөз қызметі.
«Егемен-ақпарат».