Тәуелсіздік күнін мерекелеу қарсаңында Голландияның Гаага қаласында халық әртісі Гаухар Мырзабекова басқаратын «Қазақстан Камератасы» мемлекеттік классикалық музыка ансамблінің концерті өтті.
Концерттің салтанатты ашылу рәсімінде сөйлеген Қазақстанның Нидерландтағы елшісі Мағжан Ілиясов өз сөзінде екіжақты ынтымақтастықтың барлық салаларында оң өзгерістер орын алғандығын атап өтті. Атап айтқанда, халықаралық күн тәртібі мәселелерінің көбі бойынша ұқсас ұстанымдар болып, 2018 жылда екі мемлекет БҰҰ-ның Қауіпсіздік Кеңесі шеңберінде белсенді өзара әрекеттестікке әзір екендіктерін білдіріп отыр. Музыкалық кештің шымылдығы Құрманғазының «Балбырауын» күйімен түрілді. Одан әрі аңызға айналған «The Beatles» ағылшын тобының атақты туындылары Қазақстан оркестрі тарапынан классикалық мәнерде орындалды. Концерт аяқталғаннан кейін көрермендер қазақстандық әртістерді ду қол шапалақпен марапаттады. Концерттік залдың дәліздерінде қонақтар бір-бірімен кештен алған керемет әсерлерімен бөлісті.
Тыңдармандар арасында халықаралық ұйымдардың басшылары, дипломатиялық миссиялардың басшылары, голландиялық ірі компаниялар мен банктердің басшылығы, Бенилюкс мемлекеттерінің зиялы қауым өкілдері, сондай-ақ қазақстандық диаспора және Нидерландта оқып жатқан отандас студенттеріміз болды.
Голландия Сыртқы істер министрлігі Еуропа департаментінің директоры Дафне Бергсма: «Бүгін біз «Қазақстан Камератасы» әртістері орындаған әлемдік классикалық және қазақ ұлттық әуендерінің тамаша орындалуына куә болдық. Өрелі өнерпаздар бізге аса жоғары кәсіби шеберліктері мен ұмытылмас өнер кешін сыйлады», деп атап өтті.