«Нұр Отан» партиясының хатшысы Ғабидолла Әбдірахымов жұмыс сапарымен Қызылорда облысына келді.
Сыр өңіріне сапары барысында Ғабидолла Рахметоллаұлы қаланың сол жағалауында салынып жатқан құрылыс нысандарының жұмысымен танысып, оң бағасын берді. Бұдан соң облыстық Мекемелер үйінде Елбасы, «Нұр Отан» партиясының Төрағасы Нұрсұлтан Назарбаевтың тапсырмаларының орындалу барысы жөнінде және мемлекеттік бағдарламалардың іске асырылуы бағытында жиын өткізді. Мәжіліске облыс әкімі Қырымбек Көшербаев, Президент Әкімшілігінің мемлекеттік инспекторы Нұрлан Тілешеев, мәслихат депутаттары, аудан, қала әкімдері, облыстық департаменттер мен басқарма басшылары және партия активі қатысты.
Жиынды «Нұр Отан» партиясының Қызылорда облыстық филиалының төрағасы, аймақ басшысы Қырымбек Көшербаев жүргізіп отырды. Филиал төрағасы партияның сайлауалды тұғырнамасында көзделген міндеттер мен межелерді, мемлекеттік бағдарламалардың орындалуына «Нұр Отан» тарапынан қадағалау жайында сөз қозғады. Осыған сәйкес, өңірдегі атқарылған жұмыстардың жөн-жобасымен таныстыру үшін бірқатар басқарма басшылары мен аудандар әкімдеріне сөз берілді.
Облыста білім беру саласын қаржыландыру жыл сайын артып келеді. «Өткен оқу жылында 13 мектептің құрылысы жүргізіліп, пайдалануға берілді. Ал биыл Арал, Қазалы, Қармақшы аудандарындағы 11 апаттық жағдайдағы мектептің құрылысы облыстық бюджеттен, Жаңақорғанда 300 орындық 2 мектеп «Нұрлы жол» бағдарламасы бойынша қайта салынды», – деді облыстық Білім басқармасының басшысы Бақытжан Сайлыбаев. Облыстық денсаулық сақтау басқармасының басшысы Ақмарал Әлназарова аймақтағы «Денсаулық» бағдарламасы бойынша атқарылған жұмыстарға тоқталып, оның нәтижелерімен таныстырып, медицина саласындағы кадр жетіспеушілігі жайында сөз қозғады.
Сондай-ақ Ақмарал Шәріпбайқызы бірқатар проблемаларға да тоқталды. «Медицина саласындағы мемлекеттік қызметшілерге, соның ішінде дәрігерлерге медициналық тәжірибеге тыйым салынған. Бұл өз кезегінде дәрігерлердің біліктілігіне, уақыт өте келе кәсіби дағдыларын жоғалтуына алып келеді», – деді ол. Мәжілісте Мемлекеттік қызмет істер агенттігінің Қызылорда облысы бойынша департамент басшысы, Әдеп жөніндегі кеңестің төрағасы Абзал Мұхимов, Қармақшы ауданының әкімі Сұлтан Мақашов та баяндама жасады. Жиын соңында партия хатшысы Ғабидолла Әбдірахымов Қызылорда облысындағы оң өзгерістерге тоқталып, алдағы уақытта да қарқынды жұмыс істей беруге тілектестігін білдірді.
Ержан БАЙТІЛЕС, «Егемен Қазақстан»
ҚЫЗЫЛОРДА