«Астана» халықаралық қаржы орталығының ресми таныстырылымы Астана күні қарсаңында – 5 шілдеде өтпек. Бұл елорданың 20 жылдығы тұсындағы үлкен жетістік болып отыр. Кеше Үкіметтің баспасөз орталығында өткен брифингте орталықтың басшылары осылай деді.
Елбасының биылғы Жолдауының «Қаржы секторын «қайта жаңғырту» 6-бағытындағы міндеттерді іске асыру» тақырыбына арналған баспасөз жиынына АХҚО басқарушысы Қайрат Келімбетов, «АХҚО әкімшілігі» АҚ басқарма төрағасының орынбасары Марат Әйтенов, АХҚО биржа басқармасы төрағасының орынбасары Әмина Тұрғұлова, «АХҚО әкімшілігі» АҚ цифрлы технологиялар директоры Әсел Жиенбаева қатысып, қаржы орталығының осы бағыттағы жұмыстары жайында айтып берді.
АХҚО биыл 1 қаңтарда заңды түрде іске қосылған болатын, содан бері толық жобалық қуатқа жету мақсатындағы қаржы орталығының құрылымдарын белсенді түрде өрістету жұмыстары басталды.
«Президент бастамасымен АХҚО қаржы технологияларын, инновацияларды тарту, жасыл технологияларды дамыту және инвестицияларды тарту үшін көптеген мүмкіндіктер алды. АХҚО-ның халықаралық таныстырылымы Астананың дамуына өзінің елеулі үлесін қосады деген сенімдеміз», деді Қ.Келімбетов. Сондай-ақ ол Мемлекет басшысының жақында АҚШ-қа ресми сапары АХҚО жұмысына оң әсерін бергенін атап өтті. Мәселен, Елбасы АҚШ-қа жасаған ресми сапары кезінде бизнес капитандарын АХҚО алаңына шақырды. АХҚО, Bloomberg және ABC TV отандық бизнес арнасы арасында ынтымақтастық туралы келісімге қол қойылды. Бұған қоса сапар барысында еліміздің Қаржы министрлігі, «Астана» халықаралық қаржы орталығының биржасы (AIX) және Euroclear банкі арасында ынтымақтастық туралы меморандум жасалды. Тараптар Қазақстандағы халықаралық клиринг жүйесін дамытуға келісті. Меморандум нарықтық ортаны құруды қолдау мақсатында серіктестікте жұмыс істеу ниетін білдіреді, онда шетелдік инвесторларға жергілікті қазақстандық бағалы қағаздар Euroclear жүйесі арқылы қолжетімді болады.
Қ.Келімбетов сондай-ақ жақында Давоста өткен Бүкіләлемдік экономикалық форумның негізгі тақырыптарының бірі адам капиталын дамыту мәселесі болғанын тілге тиек етті. БЭФ алаңының әлеуеті мен іскерлік ортаның бас қосуын пайдалана отырып, АХҚО Thomson Reuters-пен серіктестікте панельдік сессия өткізіпті. Аталған іс-шарада АХҚО делегациясы мүдделі топтарды Қазақстанның басымдықтары мен елде жасалып жатқан жағдайлар туралы хабардар еткен.
«Сонымен қатар Waves блокчейн-платформасымен меморандумға қол қойылды. Waves-пен жұмыс істеу арқылы АХҚО қазақстандық стартаптарға жобаларды жаңа технологиялық деңгейде дамытудың бірегей мүмкіндігін береді, осылайша бұл бастама Қазақстанда блокчейн-технологияларды танытуға ықпал етеді», деді Қ.Келімбетов.
АХҚО басшысының айтуынша, қазіргі таңда орталықтың барлық бағыттарын заңмен реттеу процесі жүргізіліп жатыр және дамушы нарықтарға инвестиция салуға мүдделі халықаралық іскер топтарды тартуға қабілетті өңірлік хабты құрудың негізгі серіктестері анықталды. Қор нарығының дамуына «Самұрық-Қазына» ҰӘҚ-тың ұлттық компаниялары акцияларын IPO-ға сәтті өткізу де ықпал етпек. Бүгінде IPO-ны тиімді өткізу тетігі әзірленуде. Оған қоса АХҚО жанынан компанияларды тіркейтін және қызметтердің кең спектрін лицензиялайтын Қаржылық қызметтерді реттеу комитеті (АФСА) жұмысын бастаған. АХҚО-ның коммерциялық және азаматтық дауларды қарайтын, ағылшын жалпы құқығының негізінде әрекет ететін тәуелсіз соты, сондай-ақ Халықаралық арбитраж орталығы құрылыпты. Сонымен қатар АХҚО базасында Шанхай қор биржасы мен NASDAQ стратегиялық серіктестеріне айналған жоғары технологиялық биржа іске қосылған.
Динара БІТІК,
«Егемен Қазақстан»