Ерінбеген етікші де, егінші де, тіпті кім болам десе сол болады. Және еңбегіне қарай өнбегі болатыны белгілі. Көрші Қытай елінде «Халықаралық қатынастар және сауда» мамандығы бойынша білім алған Әлібек Тоғайбекұлы тек оқумен шектелмей, елімізде өз бетінше кәсіпкерлікпен айналысу арманымен оралыпты.
– Қытайлардың еңбекқорлығына таңданбасыңызға қоймайды, – дейді Әлібек. – Бүкіл әулетімен көкөніс өсірумен шұғылданатын жандарды көрдім. Және олар көкөністі жылдың кез келген мезгілінде, жер жағдайы мен климаты қолайсыз өңірлерде де өсіре береді.
Елге оралғаннан кейін Әлібек осы кәсіпті өзінің туған жері Жаңаарқа ауданында қолға алуға бел буды. Аудан орталығы Атасудан бірнеше шақырым жерден жылыжайлар салуға жер телімін сайлап алды. Жас кәсіпкерді бұрын-соңды мұндай кәсіппен айналысып көрмеген ата-анасы мен інісі де қуана қолдады. Ол кісілердің, құрылыс саласынан тәжірибесі баршылық екен, сол машықтары жерді игеру мен жылыжай салу барысында көп көмегін тигізді.
«Бизнестің жол картасы-2020» бағдарламалары бойынша отбасы өз бизнесін дамытуға несие алып, іске кірісіп кетті. Алдымен жер телімін даярлау қажет болды. Төртеуі жабылып жерді бірнеше сантиметр шөптесін қыртысынан тазартты. Сол аумаққа қара топырақ төгіп, бетон жолдар төседі. Жылыжайдың сүйегін металдан жасап, төбесін поликорбанатпен жапты.
Қазір Әлібектің жылыжайының едені жылы, жылу жүйесі мен ылғалды ұстап тұратын ауабаптағыштар тәулік бойы үздіксіз істеп тұр. Бәрі қазандықтың көмегімен жылытылады. От жағушы табу қиын болмағанымен, өсімдіктерді күнделікті қадағалап отыратын агроном әзірге жоқ. Сондықтан көкөністерді отбасы мүшелері өздері бағып-қағуда.
– Бір аптаның ішінде топыраққа екі мыңдай тұқым сіңірдік, – дейді кәсіпкер. – Негізінен қызанақ отырғыздық. Біраз жерге қияр мен аскөк, тамаққа пайдаланылатын шөп түрлерін ектік.
Жылыжайдың алғашқы өнімдері бұл күндері пісуге жақын. Оларды Әлібек Жезқазған, Қаражал қалалары мен сол маңдағы 12 елді мекеннің тұрғындарына ұсынбақ. Нақты қандай бағамен өткізетінін әзірге шешпесе де, сырттан әкелінетін өнімдерден арзан, қолжетімді болады деп отыр.
Көкөніс өсіру бизнесі қыс айларында біршама артық шығынды қажет етеді. Әлібек алдағы уақытта жылыжайға газ қондырғыларын орнатуды жоспарлап жүр.
Аудандағы алғашқы жылыжайдың аяғынан қаз тұруына жергілікті әкімдік те септігін тигізуде. Билік өкілдері ара-тұра келіп, істің барысымен танысып отырады.
Көкөністі кәсіп еткен отбасы жылына 120 тоннаға дейін өнім өндіруді көздеп отыр. Олардың түр-түрін көбейту де ойда бар. Әлібек жақын арада болгар бұрышы мен баялды өсіруге де кіріспек. Оның Қытайда қарапайым адамдар өсірген өнімдерді біздің елде неге өсірмеске деген ойы дұрыс болып шықты. Көпшіліктің игілігіне бағытталған жұмыс жемісті болары сөзсіз. Әлібектің бастамасы жер-жерде қолдау тауып жатса, нұр үстіне нұр!
Қайрат ӘБІЛДА,
«Егемен Қазақстан»
Қарағанды облысы,
Жаңаарқа ауданы
Суретті түсірген Линар ГАЛИМОВ