Оңтүстік Қазақстан облысындағы ірі аудандардың бірі, тұрғындар саны 305 мыңға жуық Мақтаралда әлеуметтік нысандар құрылысының қарқыны бәсеңдеген емес.
Мысалы, өткен жылы жалпы құны 8,9 млрд. теңгені құрайтын 4700 оқушыға арналған 12 мектептің құрылысы басталып, оның 3-еуі оқу жылы қарсаңында ел игілігіне берілген. Ал биыл 8 мектепті пайдалануға беру жоспарланып отыр. Сондай-ақ, өткен жылы 2 дәрігерлік амбулатория, 4 фельдшерлік акушерлік пункт, Қарақай, Мақталы ауылдық округ әкімі аппаратының әкімшілік ғимараттарының да ресми ашылу салтанаты өткен болатын.
Аудан әкімі Ғ.Исмаиловтың айтуынша, 2007 жылы аудандағы мектептердің 50-і ғана типті ғимараттарда орналасқан болса, қазіргі таңда олардың саны 99-ға жеткен. Аудан басшылары құрылыс жұмыстарын жоғары қарқынмен жүргізу арқылы алдағы 3-4 жылда білім беру нысандарын толықтай типті мектептерге айналдыруды көздеп отыр.
Ғалымжан ЕЛШІБАЙ,
«Егемен Қазақстан»
Оңтүстік Қазақстан облысы