Қазақ баспасөзінің қарашаңырағы «Егемен Қазақстан» газетін білмейтін көзі қарақты оқырман жоқ десем, жаңсақтық бола қоймас. Ғасырға жуық тарихы бар осы аға басылымды менің де серік етіп келе жатқаныма ұзақ жылдар болды. Салмақты басылымдағы салмағы басым дүниелерді, әсіресе, орта жасты алқымдаған біздің буынның сүйіп оқитынына еш шүбә келтірмеймін.
Қай кезде де халықтың жоғын жоқтап, мұңын мұңдайтын іргелі басылымның болашағы жарқын боларына үміт зор. Осыдан екі-үш жыл бұрын алаш арыстары іргетасын қалаған бұл газеттің тоқсан жылдық торқалы тойына Елбасы Н.Ә.Назарбаевтың арнайы келуі ата басылымға деген құрметтің белгісі болды. Сондай-ақ оның таралымының жыл санап артып келе жатқандығы да оған деген оқырмандардың ыстық ықыласының арта түскенін білдірсе керек. Әрине, бұл ретте газет басшылығы мен ондағы журналистердің ерен еңбектерін де айтпай кетуге болмайды. Олардың күндіз-түні оқырмандар үшін игі жұмыстар жасап жатқандығының арқасында газет таралымының өсе түскендігі тікелей еңбекке байланысты екенін айтқан абзал. Мен мұны кәсіпкер ретінде, еңбектің қадірін бір кісідей түсінетін жан ретінде айтып отырмын.
Бүгінде оқырмандарын елдің тыныс- тіршілігімен, сондай-ақ айына бір рет жарық көретін танымға толы «етжеңді егеменімен» қауыштырып отырған газет таралымының көбейе беруіне ниеттестігімді білдіріп, ел газетіне еліміз Тәуелсіздігінің 20 жылдық мерекесі құрметіне ұжымымыздағы елу қызметкердің келер жылға жазылып, белсенділік танытқанын айтқым келеді. Бұл көрсеткіш алдағы уақытта да өз жалғасын таба береді деген сенімдемін.
Үмбет ЖҮСІПБАЕВ, «Иассы» консорциумының төрағасы, қалалық мәслихат депутаты.
Оңтүстік Қазақстан облысы, Түркістан қаласы.