Қақаған қаңтардың өзінде бір сіркіретіп жауып алатын Оңтүстіктің аспаны ақпан ортаймай жатып көз жасын жиі-жиі төгіп жатыр. Ал жылы жаңбыр алтынкүрек сияқты тау бөктеріндегі қарды күрт ерітіп, тасқынға соқтыруы әбден ықтимал. Сондықтан облыс әкімдігі су тасқынынан келетін қауіптің алдын алу шараларын ерте қолға алды.
Бүгінгі таңда аудан, қалаларда тасқынға қарсы штабтар құрылып, тәуліктік кезекшілік ұйымдастырылуда. Облыс аумағындағы барлық су қоймалары мен өзен көлдерге күнделікті мониторинг жүргізіліп келеді. Өңірдегі су қоймаларының орташа толуы 35-60 пайызды құрайды. Қаңтар айының соңында ауа райының суық болуының салдарынан Сырдария өзенінде мұз қатқан. Қазіргі таңда мұз ерігендіктен, өзен бойында орналасқан аудандарда жағдай бақылауға алынған. Оңтүстік Қазақстан облысы әкімдігі тарапынан «Су тасқыны қаупінің алдын алу және жою жөніндегі 2017-2020 жылдарға арналған іс-шаралар кешені» жол картасына 98 инженерлік шара енгізілген.
– Жол картасына сәйкес 2017 жылы 247 елді мекенде төтенше жағдайдың алдын алу және жою бойынша 42 шара ұйымдастырылды. Бұл мақсатқа 3,5 млрд теңге бөлінген. Бадам, Келес, Шаян өзендерінде арна түзеу, қорғау дамбалары және 2530 метр жаға бекіту мен 3,08 шақырым бөгет тұрғызу жұмыстары атқарылды. Сондай-ақ 352,3 шақырымдық бұрыннан бар дамбалар нығайтылып, 49 шақырым жаңа бөгеттер салынды. Бұдан бөлек, 52,5 шақырым өзен жағалаулары бекітіліп, 673,3 шақырым арық-каналдар, 397 бірлік су өткізу құбырлары тазаланды. Жергілікті халықты хабардар ету үшін дабыл беру қондырғылары сатып алынды, – деді облыс әкімі Жансейіт Түймебаев.
Сырдария өзені бойында орналасқан Шардара су қоймасының сыйымдылығы 5,2 млрд текше метрді құрайды. Бүгінгі таңда мұнда секундына мың текше метр су ағып, оның көлемі 3 млрд 185 мың текше метрге жеткен. Бірақ қоймаға жиналған су көлемі өткен жылдың осы кезеңімен салыстырғанда 1 млрд 036 млн текше метрге аз. Сондай-ақ қазіргі таңда Көксарай су қоймасында 1 млрд 739 мың текше метр су жиналды.
Облыстық бюджеттен 18,5 млн теңге бөлініп, жаңадан салынатын су қоймаларының орындарына зерттеу жұмыстары жүргізілген. Соның нәтижесінде су жинақтау көлемі 378,64 млн текше метрді құрайтын 26 су қоймасын салу қарастырылып жатыр.
Республикалық бюджеттен су жинақтау көлемі 340,5 текше метрлік 3 нысанның құрылысы жүргізіледі.
Бақтияр ТАЙЖАН,
«Егемен Қазақстан»
Оңтүстік Қазақстан облысы