Астанада Демократиялық күштердің «Қазақстан-2050» жалпыұлттық коалициясының кезекті отырысы өтті. Оған елдегі саяси партиялардың басшылары, Парламент депутаттары, Қазақстан халқы Ассамблеясының, кәсіби және қоғамдық бірлестіктердің өкілдері қатысты.
Жиын Елбасының «Президенттің бес әлеуметтік бастамасы» атты халыққа Үндеуін қолдау мақсатында ұйымдастырылды.
Іс-шараға төрағалық еткен «Нұр Отан» партиясы Төрағасының бірінші орынбасары Мәулен Әшімбаев бұл Үндеу Қазақстанның әлеуметтік жаңғыруындағы бес басым бағытты айқындап берген бірегей бағдарламалық құжат екенін айтты. Сондай-ақ Елбасы ұсыныстары халқымыздың әлеуметтік жағдайын жақсартуға айрықша әсерін тигізетінін атап көрсетті.
«Бүкіл әлем бойынша мемлекеттік әлеуметтік бағдарламалар кейінге шегеріліп, үкіметтер бұрынғы міндеттерінен бас тартып жатқан аумалы-төкпелі шақта Мемлекет басшысы осындай батыл бастамаларды қолға алып отыр. Осылайша Елбасы кезекті рет Қазақстан үшін халқының әлеуметтік жағдайы әрдайым басым бағыт болып саналатынын іс жүзінде дәлелдеп берді», деді партия Төрағасының бірінші орынбасары.
Сондай-ақ М.Әшімбаев қазіргі таңда халықтың ең басты әлеуметтік мәселесі баспана екеніне тоқталып, мұны шешу үшін атқарылып жатқан жұмыстарды мысалға алды. Мәселен былтыр рекордтық деңгейде 11 миллион шаршы метрден астам тұрғын үй салынған. Әйтсе де партия Төрағасының орынбасары әлі күнге дейін көптеген қазақстандықтың пәтерге мұқтаж екенін айтып өтті. Сондықтан да Президенттің бастамаларын жұртшылық қуана қабылдауда.
Партия Төрағасының орынбасары Үндеуде баспана мәселесі, жалақысы төмен азаматтардың салық жүктемесін азайту, жоғары білімнің қолжетімділігі мен сапасын арттыру, студент жастарды жатақханамен барынша қамтамасыз ету, шағын несие көлемін ұлғайту, бірнеше қалаға газ тарту мәселелері ұсынылып қана қоймай, оларды іске асыру тетіктері де нақты көрсетілгеніне назар аударды.
«Президенттің барлық бастамасы жан-жақты сарапталып, зерделенгенін және оларды жүзеге асыруға нақты қаржылай негіз бар екенін атап өткен жөн. Соның арқасында қазақстандықтар Елбасы тапсырмаларын жүзеге асырудың нәтижелерін таяу жылдары сезіне алады. Мемлекет басшысы бұл маңызды бастамалардың жүзеге асырылуын бақылауды «Нұр Отан» партиясына жүктеді. Осыған орай Елбасы тапсырмасы партия жұмысының алдағы уақыттағы негізгі міндеті болады», деді М.Әшімбаев.
Бұдан кейін сөз алған «Ақ жол» партиясының төрағасы, Мәжіліс депутаты Азат Перуашев «Президенттің бес әлеуметтік бастамасында» ең басты назарда қарапайым тұрғындардың мүддесі тұрғанын атап көрсетті. Яғни осы бағдарлама халықтың тұрмысын жақсартып, оларға қажетті, өзекті мәселелердің тиімді шешімін табуды мақсат етеді. А.Перуашев «Ақ жол» партиясы мен оның депутаттық фракциясы да Үндеуді қолдап, ондағы міндеттерді іске асыруға өз үлесін қосуға әзір екенін мәлімдеді.
«Мына нәрсеге назар аударғым келіп отыр. Шағын несиелеу көлемін арттыру, пайыздық және салықтық жеңілдік арқылы кәсіпкерлікті көтермелеуге талпыну құрылыс саласын дамытып, жаңа жұмыс орындарын ашуға көмектеседі. Яғни осының барлығы түптеп келгенде қарапайым халыққа пайдалы болмақ. Мұның тағы бір мысалын табысы төмендерге салынатын салықтың мөлшерін он есеге азайту жөніндегі шешімнен де байқауға болады», деді «Ақ жол» партиясының төрағасы.
Қазақстанның коммунистік халықтық партиясының хатшысы, Мәжіліс депутаты Жамбыл Ахметбеков Мемлекет басшысының бастамалары әрдайым нақты әрі ел экономикасының мүмкіндігіне сай есептелетінін айтты. Сонымен қатар Елбасының бірер күн бұрынғы Үндеуінде көтерілген баспана, жалақы мәселелері, сол сияқты білім беру мен оның сапасын арттыру Қазақстанның коммунистік халықтық партиясы ұстанымымен сәйкес келетінін жеткізді.
«Ауыл» халықтық-демократиялық патриоттық партиясының төрағасы, сенатор Әли Бектаев Мемлекет басшысының Үндеуін тарихи оқиғаға балады. Сенатор әлеуметтік бастамалар ауыл тұрғындарына тікелей қатысты болғандықтан, Елбасының Үндеуін «Ауыл» партиясы да қолдайтынын мәлімдеді.
Бұдан соң Демократиялық күштердің «Қазақстан-2050» жалпыұлттық коалициясы мүшелері, елдегі жетекші партиялар басшылары, Парламент депутаттары сөз алып, «Президенттің бес әлеуметтік бастамасына» байланысты өз ойларын ортаға салып, пікірлерімен бөлісті.
Іс-шара соңында еліміздің барша азаматтарын Қазақстанның әлеуметтік жаңғыруы жолындағы батыл қадам деп бағаланған құжатқа қолдау білдіруге, ондағы бастамаларды жүзеге асыру жұмыстарына белсенді қатысуға шақырған үндеу қабылданды.
Абай АСАНКЕЛДІҰЛЫ,
«Егемен Қазақстан»