Орталық коммуникациялар қызметінде «J1–Jastar1» жастарға арналған жаңа телевизиялық арнасының тұсаукесері өтті. Шараға арнаның бас директоры Ильяс Ысқақов, Дін істері және азаматтық қоғам министрлігі Жастар саясаты департаментінің директоры Асхат Оралов қатысты.
«J1–Jastar1» телеарнасы, ең алдымен, 14-29 жас аралығындағы жастарға арналған. Ол оқушылар, студенттер, жас мамандар мен түрлі қызмет аясында еңбек етіп жүрген жастармен қатар, ұрпақ тәрбиесіне немқұрайлы қарамайтын барлық жандар үшін де қызықты болмақ. Арнаның пішімі, жастар өміріндегі маңызды және қызықты оқиғаларға негізделген. Телеарнаның контенті ас үйі, сән және сұлулықтан бастап шытырман, тылсым оқиғаларға, спортқа, телехикаялар мен әлемдік кинематографияның хиттеріне, әлеуметтік реалити мен отбасылық қарым-қатынас, бала тәрбиелеу және денсаулық туралы ток-шоуларға толы танымдық, публицистикалық және ойын-сауықтық бағдарламалардан тұрады. Бағдарламаларда жастардың мәселелері, мүмкіндіктері мен өзін-өзі танытуы қарастырылады. «J1–Jastar1» телеарнасы бұл – бүгінгі таңда жастардың өзіне арнаның мазмұнын толтыруға мүмкіндік беріп отырған, еш арналарға ұқсамайтын ашық алаң ұсынған бірегей ерекше телеарна», деді арнаның бас директоры Ильяс Ысқақов.
«J1–Jastar1» телеарнасы Қазақстан жастарының талаптарын қанағаттандыратын заманауи телевизиялық трендтерді тарататын, жастардың жобаларын, ой-пікірлерін қолдауға, сонымен қатар олардың арасындағы өзекті мәселелерді шешуге бағытталған жаңа пішімдегі арна. Телеарна 2018 жылдың 28 наурызында ID TV платформасында, YouTube және Instagram әлеуметтік желілерінде іске қосылды. Болашақта оны Отау ТВ кабель жүйесі арқылы тарату жоспарлануда.
Рауан ҚАЙДАР, «Егемен Қазақстан»