Қазақстанда кенжелеп қалған су спорты, оның ішінде суда жүзу спорты қарқынды дамып келеді. Рио Олимпиадасында сенсациялық түрде алтын медаль алған Дмитрий Баландин соның айқын дәлелі.
Баландинге дейін жүзу спортынан әлем және Олимпия ойындарына қатысқан спортшыларымыз болды. Бірақ олар Дмитрий Баландин жеткен шыңға көтеріле алмаған еді. Дмитрийдің студенттер арасындағы Жазғы Универсиадада бір алтын, бір күміс және екі қола медаль жеңіп алғанын, Азия ойындарының үш дүркін чемпионы болғанын жанкүйер қауым ұмыта қоймаған болар.
Жуырда ғана 23 жасқа толған спортшымыз кеше төрт жыл бұрынғы жетістігін тағы қайталады. Бұл жолы Испанияның Малага қаласында су спортынан өткен Испания ашық чемпионатында. Биылғы маусымның басты додасы Индонезияда өтетін жазғы Азия ойындарына дайындықтарын пысықтап жатқан Қазақстан құрамасы аталған додада сегіз медаль олжалады. Оның үшеуін Дмитрий Баландин иеленді. Үшеуі де алтын. Испания біріншілігінде отандасымыз 200, 100 және 50 метр қашықтыққа брасс әдісімен жүзуде қарсылас шақ келтірмеді.
Сондай-ақ Қазақстан чемпионатының рекордшысы Әділбек Мусин баттерфляй әдісімен 100 және 50 метр қашықтыққа жарысудан бір күміс, бір қола жүлде еншіледі. Тағы бір отандасымыз Әділ Қасқабай 100 метрге еркін әдіспен жүзуде күміс, 50 метрге жүзуден қола алды. Ал Айбек Қамзенов 50 метрге брасс әдісімен жүзуде қола медалға қол жеткізді.
Әли БИТӨРЕ, «Егемен Қазақстан»