...“көгілдір отын” аудан орталығына жетті
Ең шалғайдағы Қызылқоға ауданының тұрғындары үлкен қуанышқа кенелуде. Осы кезге дейін мал тезегі мен көмір жағып, шелек-шелек күл шығарғандар енді табиғи газдың қызығын көретін болды. Олай дейтініміз, кеше аудан орталығы – Миялы ауылында табиғи газдың алауы жанды. Миялылық тұрғындардың қуанышты сәтін облыс әкімі Бергей Рысқалиев арнайы келіп бөлісіп, газ алауын өз қолымен жақты. Ал тұрғындар арасынан табиғи газ қызығына алдымен Қостан Сабыровтың отбасы кенеліп отыр.
– Тұрмысы төмен, көп балалы санатындағы 1500-2000 отбасына мердігер мекемелер газды үйіне дейін жеткізіп береді, – деді өңір басшысы Б.Рысқалиев аудан тұрғындарымен кездесуде.
Жолдасбек ШӨПЕҒҰЛ, Атырау облысы.
...заңды бұзған шенеуніктер жазаланды
Облыстық тәртіптік кеңестің алғашқы мәжілісінде бір топ шенеуніктің тәртібі талқыланып, түрлі жазаларға тартылды. Жиынды “Нұр Отан” ХДП облыстық филиалы төрағасының бірінші орынбасары Хамит Бекішев жүргізіп отырды.
Аурухананың гаражын сенімді басқаруға беру жөніндегі заң талаптарын өрескел бұзғандары үшін облыстық қаржы басқармасы бастығының орынбасары М.Жәмәлиев мінбеге шақырылды. Талқылау барысында кінәлары мойындарына қойылып, оған және бөлім бастығы И.Першинаға сөгіс беру ұсынылды. Ал Жамбыл аудандық оқу бөлімінің бастығы А.Моисеенконың тәртіптік кеңес талқысына түсуі бірінші емес. Былтыр бюджеттің қаржысын мақсатсыз жұмсағаны үшін қызаруына тура келген. Бұл жолы мемлекеттік сатып алуды жүргізу және ұйымдастыру талаптарын бұрмалағаны үшін жауапқа тартылды.
Ал, Тайынша ауданы Чермошнянское ауылдық аймағының әкімі А.Немошкалоның “Жол картасы” бағдарламасы бойынша бөлінген қаражатты талан-таражға салғаны анықталды. Ол әкімдік аппаратында жұмыс істейтін маманның қызын қағаз жүзінде жұмысқа қабылдап, үш айдың жалақысын қызметтік көлікті жөндеуге жұмсаған. Тәртіптік кеңес мүшелерінің оны қызметінен босату туралы ұсынысы бірауыздан қабылданды.
Өмір ЕСҚАЛИ, Солтүстік Қазақстан облысы.
...көрме ашылды
Қарағандыдағы “Азия” сауда орталығында “Қазақстан — фото көзімен” көрмесі ашылды. Онда облысқа танымал 19 фотографтың әр түрлі жанрда түсірілген суреттері қойылған. Соның ішінде Илья Житников, Людмила Шалимова, Ксения Ивановалардың табиғат көріністері, адамдар бейнесі бейнеленген туындылары көрермендер ынтасын аударды.
Аталған сауда орталығы жергілікті фотографтардың көрмесін ұйымдастыруға арнайы бөлме бөліп, демеушілік көмек көрсетті. Көрме бірнеше күнге созылады.
Айқын НЕСІПБАЙ, Қарағанды.