Әйел жауынгерлер рухымен де мықты

1941-1945 жылдары Ұлы Отан соғысының майдандарында біздің отандас­тарымыздың жанқиярлық ерлігі мен қажырлы еңбегі мемлекетіміздің дамуының, оның гүлденуі мен қауіпсіздігінің нық іргетасын қалыптастырды. Даңқты батырларымыз, оның ішінде біздің халқымыздың батыр қыздары Әлия Молдағұлованың, Мәншүк Мәметованың, Хиуаз Доспанованың есімдері қазақстандықтардың есінде және әлем тарихының беттерінде мәңгілік қалады.

Қазақстан Президенті Нұрсұлтан Назарбаевтың сарабдал саясатының арқасын­да әйелдер мемлекеттік билік­тің жоғары органдарында жауапты орындарда, біздің тыныс-тіршілігіміздің әр­түрлі салаларында табысты еңбек етуде, қазақ­стандық армияның қатарында да әскери қызмет атқаруда. XXI ғасырда «әйел – жауынгер», «әйел – офицер» немесе «әйел – сарбаз» деген түсініктер ешкім­ді таңғалдырмайды, тек қана қызығушылық пен мақ­таныш сезімдерін тудырады.

Болмысынан нәзік әйелдер қауымы бүгінде Қарулы Күштер қатарында көптеп саналады, алдарына қойылған міндеттер­ді ойдағыдай орындап жүр және әскери мамандықты меңгеру арқылы әскери мансапты табыс­ты құру перспективасына ие болды.

Бүгін Отанымыздың қор­ға­нысында сайыпқыран жігіт­термен қатар барлаушы, десантшы, ұшқыш, парашютші, байланысшы қыздар тұр. Олар­дың көпшілігі үшін камуфляж, полигон және атыс – күнде­­лік­ті сіңісті ұғым. Қазір 7900-ден ас­там әйел әскери қызметші әр­түрлі әскери гарнизондарда қыз­мет өткеруде. 

Мәселен, Қазақстан Рес­пуб­­ли­касының Қарулы Күш­терін­де алғашқы рет аға ұш­қыш – авиациялық эскадрилья авиация­лық буынының нұс­қау­шысы лауазымы­на лейтенант Ардана Ботай тағайындал­ды, ол жауынгерлік ұшақты кәсіби түрде басқаруда хас шебердің өзі. 

Әскери-теңіз күштерінде жауын­­герлік құрбылар – бас стар­­ши­на Жанар Ыбыраева және аға матрос Дарья Киричен­колар әскери қызметті ерлер­ден қалыспай атқарып, әске­ри корабль экипажының құра­мын­­да тапсырмаларды мүлтік­с­із орын­дайтындығымен ерекшеленеді. 

Әйел әскери қызметшілердің әлемдік деңгейде Қазақстанның имиджі мен беделін нығайтуға қосқан үлестерін де атап өт­кен жөн. Жыл сайын біздің армия­мыз­дың нәзік өкілдері ерлермен қатар әртүрлі халықаралық жарыстар мен оқу-жат­ты­ғуларға белсенді түрде қатысуда. 

Осылайша 2017 жылы «Оң­түстік» өңірлік қолбасшылығы 66597 әскери бөлімінің ефрейторы Шамшырақ Сер­жанова «Достастық жауынгері» дәреже­сіне ие болды және мемлекет­тік награда – «Жауын­герлік ерлігі үшін» медалімен наградталды.

Майор Ольга Рыпакова – Қару­лы Күштеріміздің мақ­та­ны­шы. Жеңіл атлетикадан Олим­­­­пиа­да чемпионы, үш ор­ден­нің иегері.

Сондай-ақ әскери әйелдер қазақстан­дық жастарды патриотизм және Отанға сүйіс­пеншілік рухында тәрбиелеу ісіне баға жетпес үлес қосуда. Орталық ансамбль басты­ғының орынбасары – Қазақстан Республикасы Қару­лы Күштері Ұлттық әскери-патриоттық ор­та­лығының бас балетмейстері Яна Чигарькова­ның кәсіби ше­берлігі мен жан­қияр­лық ең­бегі «Жас сарбаз» қозға­лысына және орталық базасында «Ерке» балалар көркемөнер тобының жұмыс істеуіне бас­тама болды. 

Әскери ұжымдарда әскери қызмет­шілердің мәселе­лерін шешуде, әлеу­мет­тік, пси­хо­ло­гия­лық-педагоги­калық жұ­мыс­­ты ұйымдастыру және жүр­гі­зу, мораль­­дық-пси­хология­лық ахуалды жақ­­сар­ту­­­­дағы негіз­гі мін­деттер әс­кери бөлім­дер ко­ман­­дирлері­нің әйелдері бас­қар­а­­тын әйелдер кеңестеріне тиесілі. 

Әрбір әскери бөлімшеде жауынгерлік рухты қолдау, тұ­рақты моральдық-психо­логия­лық ахуалды орнату және отбасы инс­­титутын нығайту – бұл мемлекеттің әс­ке­ри қауіпсіз­дігін қамтамасыз етуге әйел­дер қауымы өкілдерінің қосқан зор үлесі.

Қазақстанның әйел әскери қыз­мет­шілері рухымен ғана мықты емес, олардың ықылас­тылық, қайырымдылық және кішіпейілділік сияқты әйел таби­­ғатына тән қасиеттері әске­ри бөлімшелердің коман­дир­леріне жеке құрамның арасында бірлік пен саламатты ахуалды сақтауда көмектесе оты­рып, кез келген жағдайда әр­қа­шан жол табуға мүмкіндік береді.

Әскери қызмет өткеру жағ­дай­лары қаншалықты қиын бол­с­а да, әйелдер кез келген жағ­дайда өзінің сүйкімділігі мен әсерлілігін сақтап қалады. Бүгінде иығына погон тақ­қан әйелдер әскери борышын ерлермен қатар орындайтын және ел іргесіне берік қорған бола алатын, сонымен қатар отбасы құн­ды­лықтарын ту ететін білікті әскери қызмет­керлер санатында. 

Талғат МҰХТАРОВ, Қорғаныс министрінің орынбасары, генерал-лейтенант