Қазақстан Республикасының Сыртқы істер министрі Ержан Қазыханов Германияның астанасы Боннда өткен Ауғанстан жөніндегі халықаралық конференцияға қатысуы аясында өзінің бірқатар елдердегі әріптестерімен екі жақты кездесулер өткізді. Қазақстан сыртқы саясат ведомствосының басшысы, атап айтқанда, Германия, Ирак, Индонезия, Малайзия, Қытай, Түркіменстан, т.б. елдер сыртқы істер министрлерімен екі жақты сауда-экономикалық, оның ішінде көлік және логистика салалары бойынша ынтымақтастық мәселелерін талқылады.
Әңгімелесу барысында кейбір елдермен әріптестік ауқымы оның әлеуетін толық көлемінде көрсете алмай отырғаны назарға алынды. Мәселен, латвиялық әріптесімен кездесу кезінде екі жақты саяси үнқатысудың жоғары деңгейі атап өтілді. Алда ынтымақтастықтың кең ауқымы бойынша жұмысты өрістете түсу ниеті қуатталды. Сонымен қатар, Қазақстанның Еуропа Одағымен, Еуропа Кеңесімен ынтымақтастығы мәселелері сөз болып, Қазақстанның 2015-2016 жылдарға БҰҰ Қауіпсіздік Кеңесінің тұрақты емес мүшелігіне қабылдануға және халықаралық мамандандырылған ЭКСПО-2017 көрмесін өткізуге тапсырыстары қаралды.
Е.Қазыхановтың Португалиямен сауда-экономикалық ынтымақтастықты кеңейту перспективалары осы елдегі әріптесі Паоло Порташпен кездесуінде сөз етілді. Министрлер аталған мәселені кеңейту үшін келісімдік-құқықтық базаға сараптама жасаудың маңыздылығын атап өтіп, Қазақстан-Португалия бизнес-форумын өткізуге дайындық жүргізу жайын талқылады. Қазақстан СІМ-інің басшысы Португалия бизнесінің Қазақстандағы индустриялық-инновациялық даму бағдарламасына, әсіресе, ауыл шаруашылығы мен ауыл шаруашылығы өнімдерін өңдеуге қатысуы перспективалары зор екеніне көңіл қойды. П.Порташ өз кезегінде қазақстандық компаниялардың Португалияға инвестиция салу мүмкіндіктері зор екенін атап өтті.
Е.Қазыхановтың АҚШ Мемлекеттік хатшысының Оңтүстік және Орталық Азия елдері бойынша орынбасары Роберт Блейкпен кездесуінде екі жақты ынтымақтастықтың перспективалары мен Ауғанстандағы және Орталық Азия өңіріндегі жағдайлар талқыланды.
«Егемен-ақпарат».