Қостанайда «Рухани жаңғыру» бағдарламасын жүзеге асыру барысы туралы жиын өтті

Аймақ басшысының айт­уынша, өткен жылы Қостанай облысында «Рухани жаңғыру» бағдарламасы аясында жүзеге асырылуы тиіс 24 шағын жоба, барлығы 339 іс-шараға жалпы көлемі 2723,686 млн теңге жұм­салған. Биылғы жылы бағдарлама аясында өңірде жалпы құны 4586,5 млн теңгені құрайтын 85 жоба, 46 шағын жоба, барлығы 801 іс-шара іске асырылуда.

– Облыста 100-ден аса мектепте музей ашылып, 87 іздеу отря­ды құрылды. Жыл аяғына дейін өлкетану бағытында қо­сым­ша 14 мектеп музейі ашылады. Осы бағытта Қостанай облы­­сына танымал тұлғалар туралы мәліметтер мен экспонаттар жинастырылуда. Олардың денін танымал тұлғалардың ұрпақтары, туыс-туғандары әкелуде, – деді Архимед Мұхамбетов.

Баспасөз мәслихатында айтылғандай, 172 млн теңгеден астам жеке инвестициялардың есебінен балаларға арналған технопарктер мен бизнес-инкубаторлар желісін құру үшін облыстың барлық аймақтарын­да 21 цифрлы технологиялар кабинеті ашылыпты. Сонымен қатар бүгінгі таңда Қостанай облысында «Мамандандырылған ақпараттық технологиялар мектеп-лицей-интернаты» жобасын іске асыру басталған. Оған облыстық бюджеттен 178 млн теңгеден астам қаражат бөлінді.

– Өткен жылы меценаттардың көмегімен Кейкі батыр кесенесі мен Тархан Шақшақ Жәнібек ескерткіші тұрғызылып, бюджет қаражаты есебінен Ыбырай Алтынсарин кесенесі қайта жаңғыртылды. Жалпы, еліміздегі киелі орындар тізіміне Қостанай облысынан 29 нысан енгізілген, соның ішінде 10 жалпыұлттық және 19 жергілікті нысан бар. Биылғы жылы қасиетті нысандарды жөндеу, қайта жаңғырту және аумақтарын абаттандыруға 88,5 млн теңге қаражат жұмса­лады. Жөндеу жұмыстары Сары­көл ауданындағы Барақ батыр кесенесі мен Ұзынкөл ауданындағы Святоникольская шіркеуіне де жүргізілетін болады,– деді әкім.

Бүгінгі таңда облыста «Көр­кейе бер, Қостанай!» акциясы кең қанат жайып келеді. Соның арқасын­да өткен жылы 2 млрд 674 теңге­нің 135 әлеуметтік жобасы іске асырылды. Жергілікті кә­сіп­керлер бағ­дар­ламаның «Атамекен» жоба­сына ерекше қол­дау танытқанын айрықша атап өткен жөн. Бизнес құрылым­дар­дың атсалысуымен 101 білім беру, денсаулық сақтау, мәдениет пен спорт мекемелері жөнделіп, 61 әлеуметтік нысанның мате­риал­дық-техникалық базасы жаңар­тылған, 18 балалар және спорт алаңдары орнатылған.

Облыс әкімі баяндамасында «Атамекен» жобасы бойынша 2018 жылы 4 млрд 165 млн тең­ге­нің тағы 140 әлеуметтік жо­ба­­сы іске қосылатынын мәлім­деді. Бұған қоса 1000 орын­ға арнал­ған Ұлт­тық мәдени орталық салына­ды, Социалистік Еңбек Ері Кәм­шат Дөненбаеваның құр­­метіне сая­бақ ашылып, ескерт­­кіш мүсіні орна­тылады  және Қазақ халқына алғыс монументі бой көтереді.

Сөз соңында А.Мұхамбетов аймақтың басты байлығы оның ел тағдырына жауапты азаматтары екенін атап өтті.

Арнұр АСҚАР,

«Егемен Қазақстан»