Парламент Сенатының Төрағасы Қасым-Жомарт Тоқаев Біріккен Араб Әмірліктері Ұлттық Федералдық Мәжілісінің депутаты, Толеранттық және бейбітшілік жөніндегі жаһандық кеңестің төрағасы Ахмед бен Мұхаммед әл-Джарванды қабылдады, деп хабарлады Сенаттың баспасөз қызметі.
Қ.Тоқаев Қазақстанның Біріккен Араб Әмірліктерімен ынтымақтастығының жоғары қарқынына тоқтала келіп, оған мемлекеттер басшыларының арасындағы өзара сенімді қатынастар тікелей ықпал етіп отырғанын атап өтті.
Сенат Төрағасы Әлемдік және дәстүрлі діндер көшбасшыларының съезін шақыру туралы Президент Нұрсұлтан Назарбаевтың бастамасының іске асуы жөнінде мейманға әңгімелеп берді. «Діни көшбасшылар, мемлекет басшылары мен ірі халықаралық ұйымдардың жетекшілері, танымал саясаткерлер қатысатын бұл форум жаһандық мәселелерді шешу жолдарын іздестіретін, толеранттық пен өзара түсіністік қағидаларын нығайтатын ерекше алаң болып отыр», деп атап өтті Қ.Тоқаев.
Ахмед бен Мұхаммед әл-Джарван әлемдік діндер өкілдерінің арасындағы өзара түсіністікті нығайтуды, аймақтық және халықаралық тұрақтылыққа жәрдемдесуді мақсат ететін Жаһандық толеранттық және бейбітшілік кеңесінің жұмысы басталғаны туралы хабардар етті.
Парламент жоғарғы палатасының басшысы дінаралық үнқатысу саласындағы Қазақстан бастамасымен үйлесетін Кеңестің құрылуына қолдау білдірді. Қ.Тоқаевтың пікірінше, Съезд Хатшылығы мен Жаһандық Кеңес дінаралық үнқатысуды, өзара толерант- тықты, бейбітшілік пен қауіпсіздікті ілгерілету және нығайту мақсатында әріптестік қатынастарды орнықтыра алады. Әмірлік парламентшісі ұсыныстың келешегі зор екенін айта отырып, келісетінін жеткізді.
Қ. Тоқаев Ахмед бен Мұхаммед әл-Джарванды қазан айында Қазақстан Астанасында өтетін Әлемдік және дәстүрлі діндер көшбасшыларының VI съезіне келіп қатысуға шақырды.