Ел Тәуелсіздігінің 20 жылдығы қарсаңында облыс орталығынан этно-мәдени орталықтар аллея-алаңы ашылды.
Онда әрбір этно бірлестіктердің ұлттық болмысына сай жасалған шағын мүсіндері бар. Мысалы, «Ватан» әзербайжан этно бірлестігі Әзербайжан Республикасы бейнеленген картасын, қыз мұнарасын, гректер Афродитаның мүсінін, қырғыздар шаңырақ, домбыра, бүркіттің бейнесін, армяндар армян сәулет өнерін, славян орталығы матрешкаларын қойған. Ары қарай поляктар, болгарлар, украиндар, белорустар, корейлер, ұйғырлар өз халқының ұлттық дәстүрлеріне сай белгілерін қойған. Аллея ішінде орындықтар қойылған, бір сөзбен айтқанда, тағы бір демалыс орны ашылды.
Осының бәрі де жақсы-ау. Тек аллея ортасынан орын алған киіз үйдің жалаңаш тұрғаны көңілге бір түрлі көрінеді. Қашанда жақсылықты ырымдайтын халықпыз ғой, сол киіз үйімізді ашық-шашық қалпында қалдырмай, ұлттық дәстүрге сай келбет берсек, нұр үстіне нұр болар еді.
Фарида БЫҚАЙ,
Павлодар.