Төрткүл дүниеге Қазақ елін танытып, қадірін арттырып, мемлекетінің мерейін өсіріп, діттеген жерінен көрінуге жол ашқан елдігіміздің 20 жылдығына арналған «Тәуелсіздік толғауы» атты екінші республикалық конкурстың қорытындысы шығып, жеңімпаздары анықталды. Жүзден жүйрік шыққандарды марапаттау рәсімі өткен аптаның соңына қарай елордадағы Күләш Байсейітов атындағы Ұлттық опера және балет театрында болды.
Ұлт руханиятына олжа болып қосылған шығарма авторларын марапаттау рәсіміне еліміздің көрнекті мәдениет және өнер қайраткерлері қатысты. Конкурстың басты мақсатына тоқтала кетер болсақ, Отанымыздың опералық, драмалық театрлары мен концерттік ұйымдарының репертуарларын Тәуелсіз мемлекетіміздің жетістіктерін бейнелейтін шығармалармен толықтыру, композиторлар мен драматургтерге қолдау көрсету, бұған қоса, оларды көркем шығармалар жазуға ынталандыру, таланттардың еңбектерін көпшілікке таныту, орындаушылардың шығармашылық мүмкіндіктерін кеңейту және шеберліктерін арттыру.
Алғашқы сөзді Мәдениет вице-министрі Ғ.Телебаев алып, осыдан екі жыл бұрын өткен конкурстың жалғасы болып саналатын бұл шара аты айтып тұрғандай биыл Тәуелсіздік тақырыбына бағытталғанын, жүлдегерлердің дипломдар мен ақшалай сыйақымен марапатталатынын, озық туындылардың еліміздің жетекші театрларында қойылу мүмкіндігі бар екенін алға тартты. Сөйтіп, «Ең үздік заманауи тақырыптағы ән» номинациясы бойынша бірінші орынды композитор Серікжан Әбдінұров пен ақын Сейфолла Оспанның «Құт мекен» деген әні жеңіп алса, екінші орынға «Дүние» туындысы үшін Бейбіт Бірімғазы (композитор) Айтмұхамбет Қосжанов ие болды. Ал «Хорға арналған ең үздік шығарма» номинациясы бойынша бірінші орынды «Отаным менің Қазақстан» туындысы үшін Роберт Айдос (композитор), Құмарбек Сыдық алса, екінші орынды Жамбыл Жабаевтың сөзіне жазылған композитор Жоламан Тұрсынбаев «Бірлігің болсын, ағайын!» атты еңбегі үшін иеленді. Сондай-ақ «Ең үздік опералық шығарма» номинациясы бойынша қазақ өнерінің айтулы азаматы, жезтаңдай әнші Бекболат Тілеухан арқалы ақын, марқұм Ерік Асқаровтың сөзіне жазған «Айналайын, Азатым» туындысы үшін бас жүлдені қанжығасына байласа, «ең үздік драмалық шығарма» номинациясы бойынша бас жүлдені «Ардагер» пьесасы үшін көрнекті жазушы Төлен Әбдікұлы алды. Бірінші орын «Шәкәрім» атты туындысы үшін белгілі режиссер Әубәкір Рахимовқа тиді.
Жүлдегер шығармалардан орындалған үзінділер мен көріністер кеш ажарын аша түсті. Сондай-ақ Талғат Күзембаев, Болат Жомартов, Ерлан Біләл, Маржан Арапбаева және К.Байсейітова атындағы Ұлттық опера және балет театрының симфониялық оркестрі мен хоры, М.Әуезов атындағы Қазақ драма театры, Қазақ ұлттық өнер университетінің «Илигай» балалар хоры көпшілікке ерекше көңіл күй сыйлады.
Әсем ән, әдемі көріністермен зал толы жұрттың мерейін өсірген кеште белгілі театр сыншысы Әшірбек Сығай, атақты өнер жұлдыздары Анатолий Молодов, Бекболат Тілеухан, Қазақстанның халық әртісі Гүлжан Әспетовалар ұлттық руханиятымызға қосылған қомақты дүниелер туралы жан-жақты әңгіме қозғап, осының бәріне Тәуелсіздіктің арқасында қолымыз жетіп отырғанына нақты мысалдар келтірді.
Сүлеймен МӘМЕТ.