«Бас редакторлар клубы» Қазақстанның 2011 жылғы ең үздік редакторлары мен журналистерін және шетел тілшілерін марапаттады.
«Central Asiа Monitor» газетінің бас редакторы Бигелді Ғабдуллин республикалық БАҚ арасында, «Отырар» теледидарының (Оңтүстік Қазақстан облысы) бас редакторы Зәуре Оралбаева аймақтық БАҚ арасындағы ең үздік редактор атанды. Ал «Время» газетінің тілшісі Геннадий Бендицкий республикалық БАҚ арасында ең үздік журналист атағына ие болса, Батыс Қазақстанның «Қазақстан» телеарнасы филиалының тілшісі Данияр Рамазанов (Орал қаласы) аймақтық БАҚ арасында ең үздік журналист атанды.
Сонымен қатар, «Бас редакторлар клубы» биыл алғаш рет «Еуразияның алтын қаламы» атты жүлде тағайындаған болатын. Аталмыш жүлдеге Ресей, Беларусь және Қырғызстанның журналистері ие болды. Олар «Независимая газета» (Мәскеу қаласы) басылымының шолушысы Виктория Панфилова, «Народная газета» (Минск қаласы) басылымының бас редакторы Владимир Андриевич және Қырғызстан «Азаттық радиосы» редакциясының тілшісі Жанарбек Акаев.
Марапаттау рәсімі Астанада өтті.
Берік САДЫР.