Мемлекет басшысының бес әлеуметтік бастамасында айтылған шағын несиелеу сомасының 85 пайызын Үкімет кепілдендірмек. Мәселен, алынған бір миллион теңге несиенің 850 мың теңгесіне Үкімет кепілдік береді, ал қалған 150 мың теңге үшін несие алушы ауылдағы малын, жерін немесе басқа да жылжымайтын мүлкін кепілдікке қоя алады. Үкімет үйінде өткен баспасөз мәслихатында Еңбек және халықты әлеуметтік қорғау министрлігі халықты жұмыспен қамту және еңбек нарығын дамыту департаментінің директоры Жеңісбек Дулатов шағын несиелеуде атқарылып жатқан жұмыстармен таныстырды.
Былтырғы жылы «ҚазАгроКепілдік» АҚ және «Даму» қоры 414 несиеге кепілдік берген. 2017 жылы жалпы сомасы 32 миллиард теңге болатын 7200 шағын несие берілді. Алайда «Бастау Бизнес» жобасы бойынша білім алған тағы 5 мың адам өз ісін бастауға қажетті шағын несиелерді ала алмаған болатын. Ел Үкіметі 2018 жылы қосымша 20 миллиард теңге бөліп, шағын несиелердің жалпы сомасын 62 миллиард теңгеге жеткізуді көздеп отыр. Биылғы жылы шағын несие алатындардың саны 2017 жылмен салыстырғанда 2 есеге артып, 14 мың адамға жететін болады. Шағын кәсіпкерлікке кепілдік берудің үлесі де еселеніп, 800 кепілдік беру жоспарланып отыр. Президенттің бес әлеуметтік бастамасының бірі − «Шағын несие беруді көбейту» бойынша өзін-өзі еңбекпен қамтыған және жұмыссыз тұрғындар арасында жаппай кәсіпкерлікті дамыту үшін жеңілдікті шағын несиелер тұрақты беріліп келеді. Бұл өз кезегінде шағын және орта кәсіпкерліктің ел экономикасына қосар үлесін арттыруға мүмкіндік береді.
Еркежан АЙТҚАЗЫ,
«Егемен Қазақстан»