Ә. БЕКТҰРҒАНОВ: Туризмнің ілгерілеуіне мүмкіндік туды
Түркістан – ер Түріктің бесігі саналатын құтты мекен. Ал Түркістан облысының құрылуы Рухани жаңғырудағы басты, құнды шешімдердің бірі болды. Жалпы, еліміздің оңтүстік өңірі қандастарымыздың ұйысып қоныстанған киелі мекені екендігін ескерсек, түркі әлемінде Түркістанның алатын орны ерекше. Енді рухани астанамыз облыс орталығына айналып, экономика мен әлеуметтік саланың тамырына қан жүгіре түспек. Онсыз да еліміздегі мәдениет, білім және рухани ағартушылық мәртебесі жоғары қаланың Ұлы Жібек жолының бойындағы құндылығы арта түседі.
Біз шет мемлекеттерге шыққан сайын шетелдіктер алдымен Астанадан кейін Түркістанды еске алып жатады. Сондықтан Елбасының шешімі елдің көкейінде жүрген мәселеге дөп тиді. Ежелде Қазақ хандығының астанасы болған қала XII ғасырда жаңаша қарқынмен даму жолына түскелі отыр.
Ал дербес мәртебе алған Шымкент қаласының орны біз үшін тіпті ерекше. Енді экономиканың қарыштап дамып, туризмнің ілгерілеуіне толық мүмкіндік бар.
Жалпылай алғанда, енді оңтүстіктегі әлеуеті жоғары екі қаланың тұрғындары, олардың айналасындағы елді мекендердің халқы дамудың даңғыл жолына түскелі отыр. Тұрғындарының саны миллионнан асқан қаланың дамуында тежеу болмайды, ішкі сұраныс пен ұсыныс сәйкес келіп, ілгерілеген үстіне ілгерілей түседі.
Міне, Елбасының Жарлығымен жүзеге асқан оңтүстік өңірдегі құрылымдық өзгерістерге байланысты барша қазақстандықтардың қуанышын сезініп отырмыз. Салиқалы шешімнің игілігі мол болатындығына еш күмән жоқ.
Әбдіманап БЕКТҰРҒАНОВ, Мәжіліс депутаты
*****
Р. ҚАЛМҰРАДОВ: ел тарихының жаңа парағы
Түркістан облысының құрылуы – ата-бабалардың мұралары арқылы жеткен руханияттың Қазақстан үшін маңызды екендігінің белгісі. Бұрын «Түркістан» сөзі бүкіл Орталық Азияны атау мақсатында қолданылғаны мәлім. Енді Елбасы Нұрсұлтан Назарбаевтың бастамасымен Түркістан қаласы тарихының облыс орталығы ретінде жаңа кезеңі басталды. Елбасының тарихи шешімі Орталық Азия аймағындағы халықтардың жақындасуына септігін тигізері анық.
Яғни бұл халықаралық тұрғыда көрші мемлекеттермен ынтымақтастықты нығайтуда алар орны ерекше өзгеріс. Әкімшілік орталықтың көшірілуі жаңа жұмыс орындарын шоғырландырып, еңбекке жарамды халықтың басым көпшілігін жұмыс орындарымен қамтуға септігін тигізеді. Жаңа әлеуметтік, тұрғын үй және басқа да жобалар қарқынды түрде жүзеге асырылады. Жалпы Түркістан қаласының аймақ орталығы ретінде анықталуы – ел тарихының жаңа парағы ашылғандығының белгісі.
Түркістан облысында туризмді, ауыл шаруашылығының барлық бағыттарын, өнеркәсіп саласын дамыту үшін тың қадамдар іске асырылатыны анық. Яғни бұл қадам өңірдегі экономиканың, бизнестің, инфрақұрылым мен жолдың дамуына серпін бере отырып, Түркістанның тек киелі мекен емес, үлкен мәдениет орталығы, экономикалық ошағы ретінде дамуына жақсы мүмкіндік туғызатынына сенім мол.
Розақұл ҚАЛМҰРАДОВ,
Түркістан қаласының құрметті азаматы
*****
О. АСАНҒАЗЫ: Ақиқатқа айналған арман
Алты Алаштың ардағы марғасқа Мағжан ақын жырлағандай, «Екі дүние есігі» һәм «Ер түріктің бесігі» болған аяулы Түркістанның қазақтық қаймағы бұзылмаған қасиетті Оңтүстіктің орталық атануы, шырайлы Шымкенттің республикамыздағы дербес дамитын мегаполистер қатарына қосылып, өз алдына шаңырақ көтеруі бөркімізді аспанға ататындай аса зор қуаныш екені талас тудырмаса керек. Бұл соңынан ерген ел-жұртын өркениет өріне сүйреген парасатты Президентіміздің тағылымға толы тарихи шешімі.
Киелі Түркістанды күллі түркінің кіндік қаласы ету ата-бабаларымыздың ғасырлар бойғы арманы еді. Енді, міне, ұлтымыздың тұлпар мініп ту ұстаған ұлы перзенті Нұрсұлтан Назарбаев сол асыл аңсар-мұратты ақиқатқа айналдырды. Ойдағы ісіміз орындалған осындай ақжарылқап таңның атқанына шүкіршілік еткеніміз абзал. Кезінде еріксіз Эрмитажға кеткен қасиетті Тайқазан егемендіктің елең-алаңында Түркістанға қайта оралғанда, мұны ырыс-несібеміздің молаюына, береке-бірлігіміздің артуына балап, барша мұратымызға жеткендей барақат күй кешкеніміз, сірә ұмытылар ма?!
Басына бақ қонған сол Түркістан тәуелсіздік тұсында қайта түледі. Түбі бір туыстарымызға Қазақстанның қарашаңырақ екенін еске салатындай талай халықаралық ірі жиындар өтті ежелгі ордамыздың төрінде. Былтыр күллі түркі әлемінің мәдени астанасы мәртебесін иеленген көне шаһарда іргелі іс-шаралар ұйымдастырылғаны да әмбеге аян.
Елбасының бағалы бастамасы – «Рухани жаңғыру» бағдарламасы аясында ауыз толтырып айтарлықтай ауқымды жұмыстар атқарылғаны көп жайтты аңғартары анық. Соның арқасында өшкеніміз жанып, өлгеніміз тіріліп жатыр. Халқымыздың жадымен бірге жұлқар рухы да жаңғыруда. Мынау айтулы оқиға соның айғағы. Ендеше, алдымыздан туар ақ күннің шапағат нұры шартарапқа жылуын шашып, қазақ баласының абырой-беделін асқақтата бергей!
Қайта түлеген Түркістанның жұлдызы мәңгілік жоғарыдан жарқырауына тілектестігімізді білдірейік, ағайын!
Үш миллион халқы бар өркендеген өңірдің үкілеген үмітіндей Түркістанның туы биіктен желбірегей!
Оразгүл АСАНҒАЗЫ,
қоғам қайраткері
*****
Қ. ЖАНТӨРЕЕВА: Халқымызды қуанышқа бөледі
Елбасы Нұрсұлтан Назарбаевтың Оңтүстік Қазақстан облысының орталығын Шымкенттен Түркістанға көшірілу жөніндегі шешімін жариялауы тек өңір жұртшылығын ғана емес, тұтас халқымызды қуанышқа бөледі. Мұны бұқаралық ақпарат құралдарынан да, әлеуметтік желілерден де көріп, куә болып отырмыз.
Ұлық дініміздің таралуына, орнығуына өлшеусіз еңбек сіңірген рухани ұстаз Ахмет Ясауи еңбектері дүниеге келген киелі Түркістанға көшу – «Рухани жаңғыру» бағдарламасын орындау барысындағы үлкен тарихи өткел. Қожа Ахмет Ясауи ілімдерінің тәрбиелік мәні шыншыл, таза адамды қалыптастыру. «Хаққа қызмет ету халыққа қызмет етуден басталады» деп айтылған ғұламаның «Диуани Хикметі» халқымызға ғана емес, Ислам әлеміне ортақ баға жетпес рухани құндылық ретінде ғасырлардан-ғасырға жетіп отыр. Осындай тарихи тұлғалар мен киелі орындарға бай мекеннің өңір орталығы болуы бұл аймақта туризмнің дамуына, мәдени-рухани серпіліс бастау алуына әрі экономикалық даму қарқын алуына ықпал етері сөзсіз.
Ұлы Жібек жолы бойында орналасқан Түркістан – ежелден сауда-саттықтың ортасы, ынтымақтың ордасы. Сондықтан, Түркістанды облыс орталығына айналдыру – сөзсіз Елбасының ең бір ұтқыр шешімі.
Қалыйма ЖАНТӨРЕЕВА,
«Нұр Отан» партиясы ОҚО филиалы төрағасының орынбасары