Венгрияның Дьер қаласында грек-рим күресінен өткен «Алтын Гран-при» турнирінде бақ сынаған Қазақстанның ұлттық құрама командасы тоғыз жүлдені иеленіп, елге олжалы оралды.
Мажарстандағы жарыста Жансерік Сәрсенбиев (55 кило), Мейіржан Шермаханбет (67 кило), Темірлан Шадукаев (77 кило) және Нұрмахан Тыналиев (130 кило) өз салмақ дәрежелерінде қарсылас шақ келтірмей, жеңіс тұғырының ең биік сатысына көтерілсе, Қорлан Жақанша (55 кило) мен Ерұлан Ысқақов (97 кило) финалда ғана ұтылды. Ал Алмат Кебісбаев (67 кило), Демеу Жадыраев (72 кило) және Мирас Баршылықов (77 кило) қола жүлдені еншіледі.
Осылайша 4 алтын, 2 күміс және 3 қола медальді иеленген Қазақстан құрамасы осы турнирдің командалық есебінде екінші орынға жайғасты. Бірінші орын жарыс қожайындарына бұйырса, Иран балуандары үшінші сатыға тұрақтады.
Ғалым СҮЛЕЙМЕН, «Егемен Қазақстан»