Астана қаласының 20 жылдық мерейтойы қарсаңында, алдағы 6 шілде күні Мәдениет және спорт министрлігі, Ұлттық спорт түрлері қауымдастығының ұйымдастыруымен елорда іргесіндегі «Қазанат» атшабарында «Астана кубогы» үшін бәйге түрлерінен жарыс өтеді.
Министрліктің ұлттық спорт түрлері жөніндегі сала мамандарының алдын ала таратқан мәліметіне жүгінсек, елорданың даталы тойына орайластырып отырған жарыста жүйріктер екі қашықтық бойынша (аламан және топ бәйге) сыналады. Жарыстың жалпы жүлде қоры – 20 миллион теңге. Оны ұсынушы – Астана қаласының әкімдігі.
Сонымен қатар 25 шақырымдық аламан бәйгеден озып келген ат иесіне сәйгүлігін дұрыс баптап, оздырғаны үшін жекелей 6,6 миллион теңгенің сыйақысы берілмек. Бұл жарыстарға барлық облыстар мен Астана, Алматы, Шымкент қалалары 2 жүйріктен қоса алады.
Бекен ҚАЙРАТҰЛЫ, «Егемен Қазақстан»