Денсаулық сақтау министрі Салидат Қайырбекова 2,5 мыңнан астам ауыл дәрігерлері және медициналық жоо оқытушыларымен, студенттерімен «тікелей режімде» селекторлық кеңес өткізді.
Жиында 2011-2015 жылдарға арналған «Саламатты Қазақстан» мемлекеттік бағдарламасын іске асыру барысы және алдағы жылға арналған негізгі міндеттер талқыланды.
Селекторлық жиынға еліміздің барлық өңірінен 2,5 мыңнан астам медицина қызметкерлері, медициналық жоо студенттері, профессор-оқытушылар құрамы қатысты. Министр өз сөзінде жалпы денсаулық сақтау жүйесінің барлық бағыттары бойынша жақсы динамика байқалатынын атап өтті.
Жиын барысында Саламатты өмір салтын қалыптастыру проблемалары ұлттық орталығының директоры Ж.Баттақова, С.Асфендияров атындағы Қазақ ұлттық медицина университетінің ректоры А.Ақанов, Семей мемлекеттік медицина университетінің ректоры Т.Рақыпбеков саламатты өмір салтын насихаттау және денсаулық сақтау жүйесіне мамандар дайындау, сондай-ақ 2012 жылы алда тұрған міндеттер туралы мәлімдеді.
Телемедицинаның арқасында ауылдық медицина қызметкерлері тікелей республиканың бас дәрігері – Денсаулық сақтау министрімен тілдесіп, өздерін толғандыратын сұрақтарға жауап алды. Тәуелсіздік жылдарында денсаулық сақтау саласында қол жеткізілген жетістіктер және болашақтағы міндеттер туралы пікір алмасты. Атап айтқанда, Солтүстік Қазақстан облысы Мамлют ауданының педиатры К.Князева, Батыс Қазақстан облысы Бөрлі аудандық ауруханасының акушер-гинекологы С.Батырова, Қарағанды қаласының №4 қалалық емхананың бас дәрігері С.Шайдарова, Семей өңірлік онкологиялық диспансерінің бас дәрігері М.Сандыбаев, «Жас депутаттар қауымдастығының» жетекшісі О.Толкайлов және т.б. өз ойларын ортаға салды.
Бір айта кететін жәйт, Денсаулық сақтау министрлігінің бастамашылығымен еліміздің барлық оқу орындарында ағымдағы жылғы желтоқсанның 7-12 аралығында «Денсаулық апталығы» өтуде. «Денсаулық сабақтары» балалар мен жасөспірімдердің денсаулығын сақтауға, нығайтуға, аурудың алдын алуға бағытталған.
«Егемен-ақпарат».