Талай буын көксеген ел мұраты ақталып, Қазақстанның тәуелсіздік алғанына 20 жыл толды. Бұл мыңдаған жылдарды артқа тастаған көне тарих үшін қас-қағым сәт. Алайда, еліміз осы жиырма жылда қарыштап дамыды. Экономикада, мәдениетте, ғылымда әлем елдерін таңдандырған жетістіктерге жетті. Бұл жәй айтылған сөз емес. Тұңғыш Президентіміздің сара басшылығы арқасында бүкіл қазақстандықтардың жұмыла атқарған еңбегінің жемісі.
1995 жылы жалпыхалықтық референдум арқылы жаңа редакцияда Конституция қабылданды. Конституцияның 1 бабында Қазақстан зайырлы, әлеуметтік мемлекет деп нақты жазылды. Демек, мемлекетімізде халықтың әл-ауқатын арттыру дамудың негізгі бағытына айналды деген сөз.
Кейде жақсы мен жаманды салыстырудың керек тұстарының барын айта кету керек деп ойлаймын. Өйткені, шынайы ақиқат салыстыру арқылы көрінеді. Біз Кеңес одағы құлағаннан кейінгі тоқсаныншы жылдарды еске түсіріп, 20 жылға кейін шегініп көрейікші. Көз алдымызға тоқыраған өнеркәсіп орындары, зауыттар, қираған колхоз-совхоздар, сыйқы кеткен ауыл, елді мекендер келеді. Бұзылған балабақшалар, мәдениет ошақтары, театрлар, кітапханалар жабылып, халық өмірін мүлдем қиындата түсті. Оған қоса дүкендер мен базарлардағы ұзын-сонар кезектер пайда болды. Қазір осылардың бірі жоқ. Бүгінде гүлденіп, дамып келе жатқан Тәуелсіз Қазақстан мемлекетін көреміз. Өткен өмірдің қиындықтары бүгінде ұмыт бола бастады.
Тәуелсіздіктің алғашқы жылдарындағы осындай әлеуметтік-экономикалық дағдарысты жеңу оңайға соққан жоқ. Бұл дағдарыстан шығудағы Елбасы Нұрсұлтан Назарбаевтың көшбасшылық қасиетін ерекше айту орынды. Елді бір идея, айналасына топтастырып, татулық пен тұрақтылықты ту етіп, халықты алға бастауда көрегендік танытқан Президентіміздің еңбегі ерекше. Біз қалай айтсақ та тарих әр нәрсені өз орнына қояды. Тәуелсіздігіміздің алғашқы 20 жылы жетістікке толы болғанын келешек ұрпақ мақтанышпен еске алып, ризалықпен айтып жүретініне сенемін.
Тәуелсіздігіміздің торқалы тойы қарсаңында Парламент қабылдаған Декларация да біздің бүкіл жеңісіміз бен жетістігімізді Қазақстан халқына шынайы жеткізе білді. Қабылданған декларация еліміздің Тәуелсіздігінің 20 жылдығына арналған басты құжат болып тарихқа енді. Елдің еңсесін көтеруді, Қазақ мемлекетінің әр азаматын қорғауды басты бағдар етіп алған елдің болашағы қашанда жарқын болмақ.
Тәуелсіз Қазақстан жасай берсін дей отырып, Қазақстан халқына, әр отбасына берекелі ғұмыр, жарқын болашақ тілегім келеді. Еліміз аман, жұртымыз тыныш болсын!
Тимур ҚЫРЫҚБАЕВ, «Нұр Отан» ХДП мүшесі.
Астана.