Атырауда марафон жарысы жиі ұйымдастырылады. Бұқаралық спортты дамытуға бағытталған шараларға қатысушылар қатары да көбейіп келеді. Бірақ бұл жолғы бәйге басқаша, түнгі Атыраудың көшелерінен 2000-ға жуық желаяқ жүгіріп өтті. Ұйымдастырушылар дода Астананың 20 жылдығына арналған шаралар қатарына енгізілгенін айтады.
– Түнгі марафон бұған дейін болмап еді. Жарыс туралы жарияланған күннен бастап қызығушылық танытқандар көп болды, бұл бізге шабыт берді. Жастар ғана емес, егде жастағы тұрғындар да жарыс алаңына шықты, – дейді «Atyrau Marathone-2018» ұйымдастыру комитетінің вице-президенті Юрий Пономарев.
Бес шақырымдық жолды алғашқы болып жүгіріп өткен Базарбай Дәуталиев жеңіске жетті. 24 жастағы Базарбай Атырауда өтетін марафондарға тұрақты қатысып жүр. Мәреге алдымен келген он қатысушыға арнайы сыйлықтар табысталды. Ендігі марафон күзде болады, сондай-ақ желаяқ балалар арасында жарыс өткізу де жоспарда бар.
Бақытгүл БАБАШ, «Егемен Қазақстан»
АТЫРАУ