Кәсіпқой боксшы Геннадий Головкиннің Елбасы Нұрсұлтан Назарбаевқа тарту еткен чемпиондық белбеулері бүгінде Елбасы кітапханасының «Қазақстандағы Олимпиада қозғалысы» атты тұрақты экспозициясында жұртшылық назарына ұсыну үшін қойылды. 2018 жылдың мамырында тұсауы кесілген аталмыш экспозицияда Олимпиада қозғалысының жетекшілерімен, отандық және шетелдік спортшылармен кездесу барысында Мемлекет басшысына табысталған кәдесыйлар, марапаттар, спорт құралдары сақталған.
Бұл жерде Елбасының спорт саласындағы мемлекет саясатын ел ішінде ғана емес, шекарадан тыс ілгерілеткені үшін алған марапаттары да тұр. Олардың қатарында спорт ұйымдары мен қоғамдары, қауымдастықтары мен федерациялары тарту еткен марапаттары, сондай-ақ Ұлттық Олимпиада комитеті (ҰОК) Құрмет белгісі (2000), «Спешиал Олимпикс Қазақстан қозғалысын қолдағаны үшін» естелік медалі мен белгісі (2002), Азия Олимпиада кеңесінің ордені (2007), FILA Халықаралық күрес қауымдастығының алтын ордені (2003) сынды өзге де Олимпиада және Паралимпиада ойындарымен байланысты марапаттар бар. Олардың ең алғашқысы әрі ең ерекшесі – ХОК президенті Хуан Антонио Самаранчтың Мемлекет басшысына табыстаған «Еңбегі үшін» атты алтын Олимпиада ордені (1997).
Н.Ә.Назарбаевтың қолдауымен отандық боксшылар жетістіктерге жетіп келеді. Сол себепті де, Әуесқой бокстың халықаралық қауымдастығы (АIBА) Олимпиада боксын дамытуға қосқан үлесі үшін Елбасыға АIBА алтын орденін (2000), АIBА күміс орденін (2000), «Еңбегі үшін» алтын орденін (2002) тарту етті.
Ендігі кезекте «Қазақстандағы Олимпиада қозғалысы» көрмесі экспозициясының төрінен Г.Головкиннің WBA – Дүниежүзілік бокс қауымдастығы (2010), IBO – Халықаралық бокс ұйымы (2011), WBC – Дүниежүзілік бокс кеңесі (2016), IBF – Халықаралық бокс федерациясы (2015-2018) бойынша чемпиондық төрт белбеуі ерекше орын алды.
Әли БИТӨРЕ,
«Егемен Қазақстан»