Сарапшылардың сөзіне сенсек, бүгінгі таңда әлемде әрбір 45-ші бала аутист болып туылады. Өкінішке қарай, бұл көрсеткіш кемудің орнына артып отыр. Ал қазір Қазақстанда 60 мың адам аутизм дертімен алысып келеді.
Алайда аутизммен күресу айтарлықтай нәтиже бермейді деп есептелсе де, оны жеңуге болатынына «Аутизмді жеңеміз» жобасына қатысушылардың көзі жете бастады. Мұндай науқаспен туылған балалар да, олардың ата-аналары да күн сайын, сәт сайын мұның мүмкін екендігін дәлелдеуге көшті. Ең бастысы дүние есігін ашқан кішкентай адам қандай сынақпен туса да, іштен шыққан сәбиіңді сүйіп, оның өз қатарына қосылуы үшін қажырлы түрде күрескенде оң нәтиже беретіні белгілі бола бастады.
«Аутизмді жеңеміз» жобасы жұмыс істей бастағанына биыл бес жыл болады, осы аралықта оған қосылғандар саны үш есе өскен.
– Аз жыл бұрын ғана Қазақстанның мамандары аутизм мәселесін қабылдауға құлықты емес еді. Ендігі жерде бұл іске мемлекет те қатыса бастағанын байқаймыз. Бірақ бұл мәселемен күресуде ата-аналардың рөлі ерекше. Олар ештеңеге де қарамастан, баласын емдетудің жолдарын іздейді. Осының және әріптестеріміздің арқасында аутизммен туылған балалар өздерінің армандарына барынша жақындап, қоғамға бейімделіп келеді, – дейді «Мейірімділік ерікті қоғамы» қоғамдық қорының жетекшісі Аружан Саин.
Ал енді аутизмнен емделу жолында басты кедергілердің бірі – бұрынғыдай арнаулы мамандардың, оңалту орталықтарының жетіспеушілігі болып отыр. Дәрі-дәрмектердің қымбатшылығы мен спорттық құрал-жабдықтардың жоқтығы да қол байлайды.
Осындай мәселелерді шешу үшін «Ашық жүрек» қайырымдылық бастамасы қолға алынып, оған «Номад Иншуранс» сақтандыру компаниясы көмекке келуге дайын екендігін білдірген еді. Нәтижесінде осы аралықта «Мейірімділік ерікті қоғамы» қоғамдық қоры аталған жоба аясында айтарлықтай қаражат жинап, дәрі-дәрмектер, спорттық жаттығуларға арналған құралдар мен жалпы науқас балалардың өмірін жақсартуға бағытталған керек-жарақтарды сатып алды.
Айнаш ЕСАЛИ,
«Егемен Қазақстан»
АЛМАТЫ