Тамылжыған жаз айларының балалар үшін әсерлі әрі пайдалы болғаны жөн. Жыл бойы ұзақ оқу мен қиын емтиханнан өткен әр бала демалысты асыға күтетіні белгілі. Бала денсаулығын, ой қабілеті мен спортқа бейімділігін нығайту шараларын дұрыс өткізу оның жаңа оқу жылын сергек бастауына септігін тигізеді.
Ресми деректерге сүйенсек, жыл сайын Қазақстанда балалар мен жеткіншектердің 91 пайызы жазғы демалысын 11 мыңнан астам түрлі үлгідегі сауықтыру кешендерінде өткізеді екен.
Ақмола облыстық білім басқармасының мәліметінше, 2017-2018 оқу жылында 1-10 сынып оқушыларының саны 111700 жеткіншекті құрады. Ағымдағы жаз мезгілінде 110583 бала оқу-сауықтыру жобаларына қатысады. Бұл – жеткіншектер құрамының 99 пайыздық көрсеткіші. Өңір бойынша оқушыларды сауықтырумен 13 мемлекеттік және 6 жекеменшік лагерь айналысады. Мемлекеттік лагерьлердің сегізі табиғи су қоймаларының маңында орналасса, қалған бесеуінің ашық аспан астындағы бассейндері бар. Мұндай нысанға Зеренді ауданындағы «Сұңқар» лагері жатады.
Ақмола облысында жазғы демалысты ұйымдастыру бойынша қызу жұмыс жүргізілуде. Мәселен, облыстың 650-ге жуық білім ордасы қызықты жазғы бағдарламалар мен арнайы жобалар ұсынып отыр. Сонымен қатар оқушылардың танымдық қызығушылықтарын дамыту мақсатында ағылшын тілін үйренуге арналған бағдарламалар ұйымдастырылды. Жас экологтар жазғы демалыстарын шатырлы, киіз үй, экологиялық және спорттық лагерьлерде өткізу мүмкіндігіне де ие болуда. Жазғы оқу-сауықтыру мекемелеріне жіберу жолдамасына көп балалы отбасынан шыққан, жетім, қамқоршысынан айырылған, мүгедек балалар ие.
Жыл сайын облыстық білім басқармасы санитарлық-эпидемиологиялық қызмет өкілдерімен бірлесе отырып, еліміздің мемлекеттік балалар сауықтыру лагерьлерін жоспарлы түрде тексерістен өткізеді. Тексеріс нәтижесінде 2017- 2018 жылдар аралығында заңсыз жұмыс істейтін лагерьлер анықталған жоқ. Оқушылардың әскери-патриоттық сезімін арттыру мақсатында «Звездный» балалар сауықтыру орталығында 200-ден астам баланы қамтитын шатырлы кешен ұйымдастырылып, алғашқы демалушыларын қарсы алды. Мектеп оқушылары мен студенттерге арналған «Ұлы Дала елі» атты туристік-аймақтық зерттеу экспедициясы тамыз айына дейін жалғасын табады. Бұл ауқымды жобада 5 мыңнан астам қатысушы ел тарихы мен шежіресін зерделейтін болады. Құрамына 500 адамды жинаған туристік топ Бурабай ауданында республикалық жиын өткізсе, 10 мыңға жуық оқушы Ақмола облысы және еліміздің басқа да аймақтарына сапар шекпек. Сондай-ақ жүзден астам мектеп оқушысы ауыл өмірін зерттеп, салт-дәстүрлермен танысуға бағытталған «Бір апта ауылда» әлеуметтік бастамасына қатысу ниетін білдірді.
Ботакөз АМАЛБЕК,
Л.Н.Гумилев атындағы ЕҰУ саясаттану және журналистика факультетінің студенті
Ақмола облысы