Ағымдағы жылдан бастап елімізде «Нұр Отан» партиясының бастамасымен Қазақстан Республикасының Еңбек және халықты әлеуметтік қорғау министрлігі мен «Мемлекеттік әлеуметтік сақтандыру қоры» акционерлік қоғамымен бірлесе «Қазақстанның үздік әлеуметтік жобалары» байқауы қолға алынған болатын. Аталған байқау сәуір айында жарияланып, жобаның іріктеу кезеңі аймақтарда бастау алған еді. Тараз қаласында осы ісшараның аймақтық кезеңінің іріктеу салтанаты болып өтті.
Салтанатты шараға «Нұр Отан» партиясы Жамбыл облыстық және Тараз қалалық филиалдарының басшылығы мен қызметкерлері, мемлекеттік органдардың өкілдері, үкіметтік емес ұйымдар өкілдері мен жоба авторлары, бастауыш партия ұйымдарының төрағалары, мүмкіндігі шектеулі азаматтар мен «Жас Отан» жастар қанатының мүшелері мен белсенділері қатысты. Жиында «Нұр Отан» партиясы Жамбыл облыстық филиалы төрағасының бірінші орынбасары, комиссия төрағасы Мұратхан Шүкеев сөз алып, өмірлік қиын жағдайға тап болған тұлғаларға көрсетілетін қызметтерді қоса алғанда, өзекті әлеуметтік мәселелерді шешуге бағытталған бастамашыл әлеуметтік жобаларды қолдау байқаудың басты мақсаты екенін, аталған байқау арқылы елімізде іске асырылатын үздік бастамашыл әлеуметтік жобаларды анықтап, ұсынылған әлеуметтік жобаларда қолданылған үздік тәжірибелерді кеңінен таратып, өзекті әлеуметтік мәселелерді шешуде мемлекеттің, азаматтық қоғамның, бизнестің және азаматтардың күшін біріктіру мақсат екенін атап өтті. Сондай-ақ аталған байқаудың өңірлік кезеңінің өтуіне демеушілік жасаған «Қазфосфат» жауапкершілігі шектеулі серіктестігінің бас директоры, Қазақстанның Еңбек Ері Мұқаш Ескендіровке алғыс білдірді. Өз сөзінде Жамбыл облысы әкімінің бірінші орынбасары Бекболат Орынбеков өңірде бүгінде 43 мың мүмкіндігі шектеулі азаматтың бар екенін, оларға лайықты қолдау көрсетіліп келе жатқанын, бұл мақсатқа өткен жылы 45 миллион теңге қарастырылса, биыл 29 жобаға облыстық бюджеттен 271 миллион теңге бөлініп отырғанын жеткізді. Бұдан кейін «Қазақстанның үздік жобасы-2014» байқауының жеңімпазы, «Амазонка» қайырымдылық қорының жетекшісі Анжелика Сарьян сөз алып, қолдауы үшін тиісті азаматтарға алғыс айтты.
Байқаудың ережесі бойынша жоба авторлары «Әлеуметтік проблемаларды шешудегі ақпараттық ілгерілету», «Әлеуметтік салада еріктілер қозғалысын дамыту», «Тең мүмкіндіктермен қамтамасыз ету», «Мүгедектігі бар тұлғаларды қоса алғанда, азаматтарды жұмыспен қамтуға ықпал жасау» және өзге де бағыттар бойынша Тараз қаласы мен аудандардан өз жобаларын ұсынып, облыстық кезеңге жолдама алған болатын. Атап айтар болсақ, Тараз қаласынан 4, Шу ауданынан 3, Қордай және Меркі аудандарынан 2 жобадан, Байзақ, Жамбыл, Т.Рысқұлов, Талас және Сарысу аудандарынан 1 жобадан барлығы 16 жоба ұсынылған. Байқау қорытындысы бойынша бірінші орынды «Тараз қалалық мүгедектер қоғамы» қоғамдық бірлестігінің төрайымы Ақбөпе Қаленова жеңіп алды. Аталған бірлестіктің «Жүректен – жүрекке» жобасы бойынша дайындаған бейнеролигі көпшілікке көрсетілді. Бұдан соң көпшілік «Айналайын» балалар мен жасөспірімдер орталығы» жастар клубы» қоғамдық бірлестігі» ЮНЕСКО-клубының «Этно Арт Фест» жобасы бойынша дайындаған бейнероликті тамашалады. Нәтижесінде аталған клуб төрайымы Айгүл Разақова екінші орынмен марапатталды. «Қазақстанның үздік жобалары» республикалық байқауының облыстық кезеңіне белсенді қатысқаны үшін үшінші орынды Жамбыл облыстық «Онкологтар ассоциациясы» қоғамдық бірлестігінің төрағасы Абылайхан Батыров иеленді. Көпшілік назарына аталған бірлестіктің «Уақтылы диагностика – денсаулық кепілі» жобасы бойынша дайындаған бейнеролигі ұсынылды. Байқау жеңімпаздары мен жүлдегерлеріне қаржылай сыйлықтар мен арнайы дипломдар табыс етілді.
Бұдан кейін облыстық жұмыспен қамтуды үйлестіру және әлеуметтік бағдарламалар басқармасының басшысы Жорабек Баубеков пен облыстық ішкі саясат басқармасының басшысы Берік Құрманғали «Қазақстанның үздік әлеуметтік жобалары» республикалық байқауының облыстық кезеңіне белсене қатысқаны үшін Тараз қаласынан «Жандану» мүгедектер қоғамдық бірлестігінің төрағасы Зайтжан Юлдашев, Меркі ауданынан «Парыз-Меркі» жастар қоғамдық бірлестігінің төрайымы Ғалия Қажығалиева, Шу ауданынан «МАР-НҰР компаниясы» жауапкершілігі шектеулі серіктестігінің құрылтайшысы Ғалия Әбітаева, Қордай ауданынан «Парыз» мүгедектерге қолдау көрсету» қоғамдық бірлесігінің төрайымы Баян Қарамолдаева және Т.Рысқұлов, Талас, Байзақ аудандарынан өзге де қоғамдық бірлестіктер төрағаларын марапаттап, оларға арнайы дипломдар мен бағалы сыйлықтар табыс етті. Байқау барысында Гүлдерайым Нұрмолдаева, Нұрбол Дүйсенқұл, Ақтөре Асқар, Нұрай Ғаниқызы сияқты өнерпаздар әннен шашу шашты. Ал іріктеу кезеңінде үздік деп танылған жеңімпаз жобалар комиссия шешімімен алдағы қыркүйек айында Астана қаласында өтетін байқаудың республикалық кезеңіне жолданды.
Хамит ЕСАМАН,
«Егемен Қазақстан»
Жамбыл облысы