Денсаулық сақтау министрлігінде инфекциялық аурулардың алдын алу бойынша мәселелер талқыланды. Денсаулық сақтау вице-министрі Алексей Цойдың төрағалығымен Инфекциялық аурулардың алдын алу бойынша республикалық штабтың кезекті отырысына қатысушылар қызылша, Конго-Қырым геморрагиялық қызбасымен сырқаттану эпидемиологиялық жағдайы және халық арасында аталған аурулардың алдын алу бойынша қабылданатын шаралар жөніндегі мәселелерді талқылады. Қазіргі уақытта елімізде қызылша сырқаты бойынша жағдай тұрақты. 2018 жылғы 8 айда профилактикалық егулерден бас тарту себебінен қызылшаның 2 жағдайы тіркелді. Сондай-ақ Конго-Қырым геморрагиялық қызбасына қатысты 2018 жылдың басынан бері республиканың эндемиялық өңірлерінде 14 жағдай тіркелді. Атап айтқанда, Жамбыл облысында – 7, Түркістан облысында – 4, Қызылорда облысында 3 жағдай тіркелген. Оның ішінде осы өңірлердің әрқайсысында өліммен аяқталған 1 жағдайдан тіркелген. Сарапшылардың айтуынша, өлім жағдайлары пациенттердің дәрігерге уақтылы жүгінбеуі себебінен орын алған. Кеңес қорытындысында инфекциялық аурулардың алдын алу және оны болдырмау үшін одан арғы шараларды қабылдау бойынша тапсырмалар мен ұсынымдар берілді.
«Егемен-ақпарат»