Елбасының Жолдаулары еліміздің кемелділігі мен азаматтарының игілігі үшін қызмет ететініне көз жеткізіп те келеміз. Күні кешегі Жолдауды ұжым болып тыңдадық. Жолдауда айтылған барлық мәселе – елдің көкейінде жүрген, шешімі мен іске асыру жолдары нақтыланған мәселелер. Әсіресе өзімізге етене таныс кәсіпкерлікке, ауыл шаруашылығы тауарын өндірушілерді қолдауға қатысты айтылған бастамалар мен жүктелген міндеттер біз үшін өте маңызды.
Мемлекет басшысы алқалы жиында мысал ретінде келтірген «Бөрте-Милка» кешенді сүт фермасы бүгінде қанатын кеңге жайып, сапалы өнімдері сұранысқа ие болуда. Осы сүт өнімдерін өңдеу кешенін Елбасының 2015 жылғы Жолдауынан кейін ашқан болатынбыз. Сол Жолдауда көтерілген бастамаларға сүйеніп, айқын мақсаттарды негізге ала отырып іске кірістік. Міне, арада үш жыл өтті, бүгінде жемісін халық көріп жатыр. Біздің кешенді ферма Жолдау жүктеген міндеттердің жүзеге асырылып жатқанын білдіретін нәтижелі бір ғана мысалы дер едім. Елбасының Ақордада отырып, ауылдағы біздің жағдайымызды, жұмысымыздың нәтижесін жақсы білетіні халыққа етене жақын екендігін тағы бір дәлелдеп отыр. Телеарна алдында Жолдауды тыңдап отырған ұжымымыздың қуанышында шек жоқ. Бізге бұл жайт қосымша күш-қуат берді. Бүгінде сүт өңдеу бойынша көрсеткіштеріміз де, сапа да жоғары. Соған сәйкес жұмысшылардың айлығы да көбейген. Серіктестікте 70 адам жұмыс істейді, орташа айлық 100-200 мың теңге аралығында. Өнім көлемінің, сапасының артуы соңғы технологиялармен жабдықталуға тікелей байланысты. Ақылды технологияларды өндіріске енгізудің нәтижесінде сиырларды сауыншы емес, робот сауады. Мамандарымызға жаңа технологияларды меңгерту, Елбасы Жолдауында айтылған роботтандырылған жүйелер мен өзге де инновацияларды енгізу арқылы сүт өндірісін 2 есеге көбейттік. Екі жыл бұрын голштин тұқымдас 400-ден астам Зеңгі баба төлін сатып алған болатынбыз. Қазір мал басы 900-ден асты. Қайта терең өңделген өнім еліміздің түкпір-түкпіріне тасымалдануда.
Елбасы Жолдауында 2022 жылға қарай еңбек өнімділігін ұлғайтып, өңделген ауыл шаруашылығы өнімдерінің экспортын 2,5 есеге арттыру керектігі айтылды. Біз өнімдерімізді экспортқа шығаруға біртіндеп жақындап келеміз. Қазір алдымен өз тұтынушыларымыздың сұранысын толық қамтамасыз ету мақсатында жұмыс істеудеміз. Ешқандай қоспасыз таза табиғи болғандықтан, өнімдеріміздің сақталу мерзімі – 7 күн. Сұраныстың болуы осыған да байланысты шығар. Алдағы уақытта да серіктестік жаңа жобаларды жүзеге асырып, тұтынушыларды отандық өніммен қамтамасыз етуге қомақты үлесін қосатын болады.
Нұралы ӘБІШЕВ,
«Бөрте-Милка» ЖШС құрылтайшысы, директоры
Түркістан облысы