Тәуелсіздіктің 20 жылдығы бәрімізге үлкен ой салды. Ел өміріндегі ерекше белес барша қазақстандықтар үшін тағылымды мереке ретінде атап өтілді. Рухани болмысымыз бен ұлттық санамыздың биіктеп, мемлекет, ұлт мүддесі жолында топтаса білетінімізді айқын аңғартты. Қазақстан Республикасының Президенті, Ұлт көшбасшысы Н.Ә.Назарбаев Ел Тәуелсіздігінің мерейтойына арналған салтанатты жиналыста сөйлеген сөзінде қол жеткен жетістіктерімізбен қоса іргелі міндеттерді де белгілеп берді. Алда жаңа технологиялар төңкерісі күтіп тұрғанын, түбегейлі өзгерістер жаңа экономикалық әлем құрылысының негіздерін айқындайтынын, оған дайын болуымыз керектігін атап өтті. Сонымен қатар, қауіп-қатерлер кездесетінін де ескертті. Осындай тығырықтарға ұрынбай, аман-есен шығудың жолы ретінде мықты экономика мен күшті мемлекет қалыптастыруды ұсынды. Бұл орайда, білім беру мен денсаулық сақтау, жастар және тұрғын үй саясаты маңызды рөл алары сөзсіз. Енді «Өмір сапасы–2030» Жалпыұлттық бағдарламасы іске қосылып, адамдар лайықты жұмыспен, қолжетімді тұрғын үймен, сапалы денсаулық және білім беру жүйелерімен қамтылатын болды. Болашағын, келешегін ойлаған ел ғана осындай қадамдарға барса керек.
«Дені сау ұлт–2030» Жалпыұлттық бағдарламасы да жұртшылықты саламатты өмір сүруге ынталандырып, демографиялық өсімге, ана мен бала өлімінің азаюына, аса қатерлі аурулардың алдын алуға ықпал жасары анық. Өйткені, мұнда медицина саласын дамытудың ұзақ мерзімді шаралары қарастырылған.
Біздің болашағымыз кімдер дегенде, сөз жоқ, қазіргі жастар алдымен ойға оралады. Ол заңды да. Жасампаздықтың жиырма жылында талабы биік, заманның қазіргі технологияларын терең меңгерген, білімді буын қалыптасты. Елбасының елімізбен бірге кемелдік кезеңге аяқ басқан жастарға сенім артуы – олардың қадамына берілген лайықты баға. Желкілдеп өсіп келе жатқан жас буынның білікті маман, отаншыл азамат болып өсуіне, ғылым мен білімнің озық жүйесін меңгеруге елімізде барлық жағдай жасалған. Іргесі берік, бірлігі бекем мемлекеттің жақсы дәстүрлерін жалғастыруға олардың мүмкіндіктері мол.
Бір сөзбен айтқанда, Президенттің әр сөзінен қазақстандықтарға деген нақты қамқорлық анық аңғарылады.
Бақытжан СӘМИЕВА, Солтүстік Қазақстан облыстық іскер әйелдер ассоциациясының төрайымы.
Солтүстік Қазақстан облысы.