Спорттың жекпе-жек және күш қолданылатын түрлері бойынша конфедерация кубогының іріктеу турында Ақмола, Қызылорда, Түркістан және Солтүстік Қазақстан командалары өзара күш сынасты.
Жарыстың ашылу салтанатында денешынықтыру және спорт басқармасының басшысы Руслан Есеналин осымен үшінші рет өткізіліп отырған айтулы шара өңіраралық бәсекелестік ортаға айналғанын, алғаш рет бойжеткендер бақ сынайтын ерекшелігін, Конфедерация арасында қол қойылған меморандумға орай жергілікті жерлерде спорт түрлері кеңінен өріс алғанын атап өтті.
Боз кілемге бірінші болып таэквондошылар шықты. «Күш атасын танымас» демекші, түркістандықтар қызылордалықтардан айласын асырды. Олар басқа қарсыластарын да тізе бүктіріп, бірінші орынды иеленді. Еркін күрестен де мерейлері үстем болды. Грек-рим күресінен алаң иелері ақмолалықтардан жеңіліс тапқанымен, қалған белдесулерде есесін жібермеген күйі жеңістің ең биік тұғырына көтерілді. Дзюдодан Сыр бойының өкілдері алдарына жан салмады.
Өмір ЕСҚАЛИ,
«Егемен Қазақстан»
Солтүстік Қазақстан облысы