Жақында Чеxияның Острава қаласында джиу-джитсудан өткен Әлем чемпионаты өткен болатын. Ересектер арасындағы жекпе-жек жарысына жетісулық жас спортшы Айбек Ахметов те қатысқан еді. Ол әлемнің мықты спортшылары жиналған чемпионатта күміс жүлдеге қол жеткізіп, халықаралық дәрежедегі спорт шебері атағын иеленді.
Айбектің жасы жиырмада. Алакөл ауданында туып-өскен. Жекпе-жек өнерін бала күнінен серік етті. Джиу-джитсудан ел ішіндегі жарыстардың барлығында топ жарып келеді. 8 дүркін Қазақстан чемпионы болды. Осы спорт түрінен Азия біріншілігінің жеңімпазы. Енді әлем чемпионатының күміс жүлдесін олжалады.
- Айбол талай байрақты бәсекелерде өзін жақсы қырынан көрсетіп, жеңіс тұғырына көтеріліп жүр. Болашағы әлі алда ғой. 20 жасында әлемнің мықты джиу-джитсушыларымен иық теңестірді. Өзі намысты, өр рухты жігіт. Жаттығуда ерекше төзімді, қайсар қалпынан айнымайды. Нәтижесінде жеңіс тұғырына көтерілді. Шәкіртіме сенемін - дейді әлем чемпионатының күміс жүлдегерінінің бапкері жаттықтырушы Арнұр Нұрланұлы.
Қалмаханбет МҰҚАМЕТҚАЛИ,
«Егемен Қазақстан»
Алматы облысы