Маңғыстау облысына электрмен жүретін 18 және газбен жүретін 70 автобус жіберу туралы Ақтау қаласының әкімі Ғалымжан Ниязов, «Каспий» ӘКК» АҚ Басқарма төрағасы Жомарт Әбиесов және «СарыарқаАвтоПром» ЖШС директоры Сырым Семейбаев арасында үш жақты келісімге қол қойылған болатын.
Осы меморандум шеңберінде газбен жүретін «Ankai» маркалы автобусты пайдалану сапасын сынақтан өткізу жоспарланды. Сынақ оң нәтиже көрсеткен жағдайда «Каспий» ӘКК» АҚ Маңғыстау облысының автобус паркін 70 автобуспен толықтырады. Ақтаудағы жолаушылар автокөлігін жаңарту мақсатында техникалық тозығы жеткен автобустар экологиялық таза көліктерге біртіндеп ауыстырылады. Жоба шеңберінде Қостанайдағы машина құрастыру зауытынан тағы да 18 электробустар алынбақ.
Ақтау қаласымен қатар Астанада да 70 электробусты бағыттарға жіберу мәселесі қаралуда. Ол үшін қытайлық мамандар келіп, электробустар бағыттары мен оларды зарядтайтын станцияларды орнату жұмыстарымен айналысуда.
Нәзира ЖӘРІМБЕТ,
«Егемен Қазақстан»
Қостанай