Елімізде Елбасы Н.Ә.Назарбаевтың Жарлығымен «Қазақстанның Еңбек Ері» атағының тағайындалғанына биыл 10 жыл толады. Осы жылдары кез келген еңбек адамы үшін республикамыздағы ең мәртебелі атақ 23 ерен тұлғаға берілген екен. Алғашқы құрмет ұстаз А.Т.Миразоваға көрсетілді, бұл шын мәніндегі әділ де заңды таңдау болатын.
Ал марапатталғандарға келер болсақ, олардың қай-қайсысы да көпке танымал қайраткерлер. Барлығының аты-жөнін атап шығу біраз орын алар еді, сол себепті қысқаша ғана тоқталайық. Мәселен, «Родина» агрофирмасы» ЖШС-нің бас директоры И.Сауэрді, мұнай-газ өндіру саласының ардагері Ұ.Қарабалинді немесе кардиохирург Ю.Пяны білмейтін жан кемде-кем. Әдебиет пен өнер және спорт салалары да назардан тыс қалмапты: Ә.Кекілбаев, О.Сүлейменов, А.Мұсаходжаева, Ю.Померанцев, А.Әшімов, Ж.Үшкемпіров және тағы басқалары.
Жоғары мәртебелі атаққа лайық деп танылғандардың ішінде аграрлық сектордың өкілдері басымдау екен (9 адам), өнеркәсіп саласынан бес адам (ішінде болат балқытушы да бар) озып шыққан, мәдениет өкілдері төртеу, дәрігер екеу. Былай алып қарағанда, өндіріс саласы, сөз жоқ, біршама қамтылған. Дегенмен де, кейбір салалардың өкілдері жоқтың қасы. Мысалға, темір жолды алайықшы. Баршамызға белгілі, Елбасы бұл саланы Қазақстан экономикасының қалыптасуындағы, мемлекет тәуелсіздігін, елдің аумақтық тұтастығын және әлеуметтік тұрақтылығын нығайтудағы рөлін жоғары бағалайды. Атқарылған игі істер де баршылық. Еліміз тәуелсіздік алған соң темір жолдың оңтайлы ұлттық желісін құру қолға алынды, өйткені кейбір өңірлер мен облыстар арасындағы көлік байланысы көрші мемлекеттің учаскелері бойынша жүзеге асырылатын. Жаңа желілердің іске қосылуы өңірлер арасындағы ішкі коммуникацияларды, Қазақстанның транзиттік және экспорттық әлеуетінің өсуін қамтамасыз етті. Қазіргі уақытта Қазақстанда 5 халықаралық темір жол көлік дәлізі жұмыс істейді.Тамаша жетістік! Сол игі істерді атқарушылар кім? Әрине, теміржолшылар, құрылысшылар!
Менің пайымдауымша, қарапайым жол бригадирі, тоғыз жолдың торабынан шыққан қандыағаштық Молдаш Жаңабергеновтан соң (о да Одақ кезінде болған жағдай) бірде-бір теміржолшы мұндай жоғары атаққа ұсынылмаған екен. Лайықты адамдар жоқ емес, бар ғой! Басқасын айтпағанда, тәуелсіздік жылдары замана талабына сай темір жол құрылысын жүргізуді жетік меңгерген отандық кәсіпқой менеджерлер тобы қалыптасты. Солардың ішінен Борис Александрович Исинамановты айрықша атар едім. Жалпы бұл азаматтың есімі Қазақстан теміржолшыларына жақсы таныс. Ол бұл тың салаға мол тәжірибе жинақтап барып келді. Кезінде Батыс Қазақстан темір жолы бастығының орынбасары, Ақтөбе темір жол бөлімшесінің бастығы болып қызмет еткен. Темір жол салу жөнінде жаңа жоба қолға алынса болды, инвесторлар Борис Александровичтің көмегіне жүгінеді. Өйткені ол біліктілігі мен басқарушылық қабілетінің арқасында кез келген қиындықты жеңуге әзір, өте сенімді адам.
Қорыта айтқанда, Борис Александрович Исинаманов тәжірибелі жолшы-инженер, іскер ұйымдастырушы ретінде Қазақстан темір жолындағы жаңа жол құрылыстарының көпшілігіне жетекшілік етті, олардың ұзын саны мыналар: Хромтау – Алтынсарин – 404,5 км, Жетіген – Алтынкөл – 235,0 км, Арқалық – Шұбаркөл – 225,0 км, Алматы-1 – Шу (екінші жолдар) – 100 км, Жезқазған – Сексеуіл – 494,5 км.
Б.Исинамановтың басшылығымен салынған жаңа темір жолдардың жалпы ұзындығы 1460 шақырымды құрайды, ал бұл бір темір жол бөлімшесінің жолдарына пара-пар.
Борис Александрович әлі күнге дейін еңбектен қол үзген емес, әлі де тың, қайратты – 2017 жылдың шілде айынан бастап «Досжан теміржолы» АҚ президентінің кеңесшісі болып жұмыс істейді. Қара жұмысшыдан бастап еңбекте құрыштай шыңдалған ардагер. Өз ісіне берілген мұндай болат жол бағбандары Қазақстан темір жолында көптеп саналады.
Нағашыбай БАЛМАХАНҰЛЫ,
журналист
Ақтөбе