Алматыда Спорт және дене шынықтыру істері агенттігініңұйымдастыруымен 2011 жылы спорт саласын дамытуда елімізгееңбек сіңірген бір топ азаматтарды марапаттауға арналған дәстүрліспорт кеші өтті.
Оған агенттік төрағасының орынбасары Елсияр Қанағатов, Штаттағы ұлттық командалар және спорт резерві дирекциясының директоры Қайыргелді Жанпейісов, көрнекті қаламгер Сейдахмет Бердіқұловтың ұлы Заңғар Бердіқұлов, Қазақстан Спорт баспасөзі қауымдастығының президенті, белгілі жазушы, республикалық қазақ және орыс тілді «Sport» және «Спорт» газеттерінің бас директоры – бас редакторы Несіп Жүнісбаев, халықаралық аренада еліміздің намысын қорғап жүрген танымал спортшылар мен олардың бапкерлері, спорт федерацияларының басшылары мен БАҚ өкілдері қатысты.
Алматыда Спорт және дене шынықтыру істері агенттігініңұйымдастыруымен 2011 жылы спорт саласын дамытуда елімізгееңбек сіңірген бір топ азаматтарды марапаттауға арналған дәстүрліспорт кеші өтті.
Оған агенттік төрағасының орынбасары Елсияр Қанағатов, Штаттағы ұлттық командалар және спорт резерві дирекциясының директоры Қайыргелді Жанпейісов, көрнекті қаламгер Сейдахмет Бердіқұловтың ұлы Заңғар Бердіқұлов, Қазақстан Спорт баспасөзі қауымдастығының президенті, белгілі жазушы, республикалық қазақ және орыс тілді «Sport» және «Спорт» газеттерінің бас директоры – бас редакторы Несіп Жүнісбаев, халықаралық аренада еліміздің намысын қорғап жүрген танымал спортшылар мен олардың бапкерлері, спорт федерацияларының басшылары мен БАҚ өкілдері қатысты.
Кеште әуелі Спорт және дене шынықтыру істері агенттігінің төрағасы Талғат Ермегияевтің құттықтау хаты оқылды. Осыдан кейін қалыптасқан дәстүр бойынша әртүрлі номинацияларда спортты дамытуға қосқан үлесі үшін тағайындалған сыйлықтың бір топ иегерлерін марапаттау рәсімі өтті. Оны агенттік төрағасының орынбасары Елсияр Қанағатов бастаған бір топ спорт саласының басшылары жүргізді. Марапаттау рәсімінде Елсияр Баймұхамбетұлы сөз сөйлеп, спортшыларды өткен жылғы табыстарымен құттықтап, алдағы уақытта өтетін жарыстарда құрмет тұғырының ең биік сатыларынан көріне берулеріне тілектестігін білдірді.
Одан әрі жеңімпаз атанған спортшыларды марапаттау рәсімі өтіп, мұнда әуелі «Жылдың ең үздік спортшысы» жүлдесінің жеңімпазы мен «Жыл спортшысы» номинациясында жүлдегер атанған спортшыларға диплом табыс етілді. Сөйтіп, «Жылдың ең үздік спортшысы» атағына ауыр атлетикадан үш дүркін әлемнің чемпионы Илья Ильин ие болды. Ал «Жыл спортшысы» жүлдесімен мына спортшылар марапатталды. Бұл номинацияда грек-рим күресінен 2011 жылғы әлем чемпионатының күміс жүлдегері, 2010 жылғы қола жүлдегері Алмат Кебісбаев (бапкері – Б.Қоңыратов), бокстан екі дүркін әлем чемпионы Серік Сәпиев (бапкері – А.Стрельников), Бакуде өткен әлем чемпионатының күміс жүлдегері Әділбек Ниязымбетов (бапкері – М.Жақиев), дзюдодан 2009 жылғы әлем чемпионы Максим Раков (бапкері – Т.Байшолақов), самбодан төрт дүркін әлем чемпионы Ерболат Байбатыров (бапкері – М.Оңдағанов), ауыр атлетикадан әлем чемпионы Зүлфия Чиншанло (бапкері – В. және А.Ни), 2009-2010 жылдардағы әлем чемпионы Светлана Подобедова (бапкері – А.Ни), жеңіл атлетикадан 2010 жылғы әлем чемпионы Ольга Рыпакова (бапкері – С.Рыпаков) мен былтырғы жылы тұңғыш рет төл күресімізден өткен «Қазақстан барысы» турнирінің жеңімпазы Ұлан Рысқұл (бапкері – С.Мұстафаев) «Жыл спортшысы» атағын иеленді.
Сондай-ақ, кеште шахматтан жасөспірімдер арасында төрт дүркін әлем чемпионы атанған қаршадай қызымыз Жансая Әбдімәлікке «Жыл жарқылы», ал өткен жылы тұңғыш рет әлем чемпионы тәжін басына өлшеп көрген тағы бір балауса қызымыз Бибісара Асаубаеваға «Жыл ашар» атағы берілді. Одан кейін ауыр атлетикадан, грек-рим күресінен және бокстан Қазақстан ұлттық құрамасының бас бапкерлері Алексей Ниге, Мұратбек Қасымханов пен Мырзағали Айтжановқа «Жылдың үздік жаттықтырушысы» атағы табыс етілді.
Кеште еліміздің ең үздік спорт және дене шынықтыру басқармалары да марапатталды. Мұнда үш өңірдің басқармалары үздік деп танылды. Олар – Алматы, Қарағанды және Қызылорда облыстық басқармалары. Бұл жүлдеге М.Тұрсынбеков (Алматы облысы), Р.Қожабеков (Қарағанды облысы) пен С.Мұстафаев (Қызылорда облысы) ие болды. Сонымен бірге, 2011 жылғы ең үздік спорт федерациясы номинациясында ауыр атлетика, бокс және шахмат федерациялары дипломдармен марапатталды.
Спорт кешенінде мүгедек спортшылардың еңбегіне баға берілді. Бұл жүлде екі қолынан айырылса да, аяғымен жүзіп әлем чемпионы атанған Михаил Еременко мен әлем чемпионы Сыздық Далиевке тапсырылды. Осыдан кейін спортшылардың жарыс жолындағы жетістіктерін алғашқы болып жұртшылыққа жеткізетін журналистердің еңбегі де ескерусіз қалмады. Осы байқауда «Егемен Қазақстан» газетінің тілшісі Дастан Кенжалин, «Қазақстан» ұлттық телеарнасының журналисі Дина Ысқақова мен «Астана Спорт» журналының шолушысы Жанар Өтешова 2011 жылғы Сейдахмет Бердіқұлов атындағы сыйлықтың лауреаты атанды.
Осы күні спорт кеші Қазақстан Спорт баспасөз қауымдастығының кезекті отырысымен жалғасты. Жиында қауымдастық президенті Н.Жүнісбаев жаңадан құрылған ұйымның жұмысы, жақында ғана Австрияның Инсбург қаласында өткен Халықаралық спорт баспасөз қауымдастығының 75-ші конгресі туралы мәліметтер берді. Одан кейін ол ҚСБҚ-ны дамытудағы ойлармен бөлісті.
Отырыста көтерілген тағы бір мәселе – атқарушы комитеттің мүшелігіне лайықты журналистерді таңдауға арналды. Қазір оған 29 спорт шолушысы мүше болса, алдағы уақытта әрқайсысының еңбегіне қарай атқарушы комитеттің мүшесі болуға лайықтылар ғана таңдап алынатыны айтылды. Осыдан кейін қауымдастық жанынан ардагерлер кеңесін құру мәселесі сөз болды. Бұл кеңестің мүшелігіне белгілі қаламгерлер Сұлтанғали Қаратаев, Рабат Жәнібеков пен Сайын Тұрсынов сайланды. Оларға жиында Қазақстан спорт баспасөз қауымдастығының атынан сыйлықтар табыс етілді.
Қанат ЕСКЕНДІР.
Алматы.
Суретті түсірген Юрий БЕККЕР.