Шамалған ауылындағы Қазақстан Республикасының Тұңғыш Президенті – Елбасының «Атамекен» тарихи-мәдени орталығы осыдан бір жыл бұрын ашылған болатын.
Осы мерзім аралығында Елбасының кіндік қаны тамған ауылдағы руханият ордасынан адам аяғы арылған емес. Өйткені бұл орталық Нұрсұлтан Назарбаевтың Мемлекет басшысы ретіндегі өрнекті өмір жолынан сыр шертіп қана қоймай, тұтас еліміздің тәуелсіздік тарихынан мол мағлұмат беретін мекенге айналды.
Орталықтың ашылу сәтінде Тұңғыш Президент – Елбасы қорының атқарушы директоры Қанат Жұмабаев ерекше сый ретінде Мемлекет басшысының 2001 жылы мінген қызметтік автокөлігін тарту еткен еді. Президентке қызмет көрсеткен сол «Мерседес» машинасы қазір рухани орталыққа келушілердің қызыға тамашалайтын экспонатына айналыпты.
– Орталық бір жылдың ішінде ел көңілінен орын тауып, келушілердің қызығушылығын оятқан рухани орынға айналды. Бұған дейін Нұрсұлтан Назарбаевтың өмір жолынан сыр шертетін танымдық орталықтың міндетін Шамалғандағы орта мектеп жанындағы музей атқарып келген еді. Ал «Атамекен» тарихи-мәдени орталығы шамалғандықтар ғана емес, тұтас еліміздің мақтанышы болатындай рухани кешенге айналды, – дейді орталық директоры Жәмилә Елғондиева.
Айтпақшы, мұнда келушілерді қызықтыратын экспонаттың бірі – Мемлекет басшысы пайдаланған үкіметтік автокөлік дедік. Әсіресе орталыққа жиі келетін мектеп оқушылары Елбасы мінген көлікті айналшықтап жүреді екен.
Жалпы, бұл орталықтың алтын қорына жиналған барлық экспонаттар Елбасының балалық шағынан бастап егемен елдің Көшбасшысына айналғанға дейінгі кезеңді қамтиды. Құнды жәдігерлерді жинақтауға Шамалғандағы тарихи өлкетану мұражайы, орта мектептің ұжымы жұмылса, Мемлекет басшысының жазба еңбектері мен танымдық фотосуреттері, әр жылдарда жарық көрген кітаптары Елбасы кітапханасы мен Ұлттық кітапхана мұрағатынан алынып, ел назарына ұсынылуда.
Қалмаханбет МҰҚАМЕТҚАЛИ,
«Егемен Қазақстан»
Алматы облысы