Тәуелсіздік күні мерекесі қарсаңында Елбасы кітапханасының музейі ғимаратында ел Президенті Нұрсұлтан Әбішұлына шет мемлекеттер мен үкімет басшылары, шетел делегациялары, ел тұрғындары тарту еткен сыйлықтардан тұратын арнайы экспозиция залы ашылды.
Музыка аспаптарының коллекциясына қарапайым аспаптардан бастап, құрылымы мен орындау мүмкіндігі бойынша аса күрделі болатын 35 жәдігер қойылған. Жалпы, «Әлем халықтарының музыка аспаптары» тұрақты көрмесін құру идеясы ЭКСПО-2017 халықаралық көрмесі кезінде музейге келген қонақтардың қызығушылығынан туындаған. Ал «Қазақстанның спорттық даңқы» экспозициясы Ұлттық олимпиада комитетінің ынтымақтастық жөніндегі меморандумы аясында ұйымдастырылатын іс-шаралар қатарын жалғастырады. Кезекті бір мәртебелі жеңістен соң «Жеңісімді Елбасына арнаймын» деп жататын даңқты спортшылардың тарту еткен сыйлықтары, мәселен, В.Жиров пен М.Мәзімбаевтың белбеуін, А.Винокуровтың велосипеді мен киімін де осы қатардан көре аласыз.
Жиынға бокстан халықаралық дәрежедегі спорт шебері, боксшы Мерей Ақшалов, Мемлекеттік күзет қызметі Президент оркестрінің ән және эстрада ансамблі басшысы, майор Марал Сахметова қатысып, мерекелік кештің шырайын кіргізді.
Ая ӨМІРТАЙ,
«Егемен Қазақстан»