Қайырымдылықты дәріптеп, белсенді азаматтық бастамаларды дамыту мақсатында өткен жылдың қараша айында басталған «Қайырымдылық керуені» республикалық байқауы жалғасып жатыр.
Байқауға әлеуметтік, қоғамдық проблемаларды шешуге және өздерінің жомарттығымен басқаларды мейірімділікке ынталандыруға үлес қосып жүрген жеке және заңды тұлғалар қатыса алады. Жобаны ҚР Тұңғыш Президенті – Елбасының қоры, Қазақстанның Іскер әйелдер қауымдастығы және «Хабар» агенттігі бірлесіп жүзеге асырып отыр.
«Біздің мақсатымыз – еліміздегі азаматтық бастамаларды қолдап, азаматтық және адамгершілік борышына адал ерекше тұлғаларды таныту және олардың істерін елімізге, жастарға насихаттау. Байқау еліміздің бүкіл аумағында өткізіліп жатыр» деді Астана қаласы әкімдігінің баспасөз орталығында өткен жиында ҚР Тұңғыш Президенті – Елбасы қоры атқарушы директорының орынбасары Сұлтан Айтжанов.
Ұйымдастырушылардың айтуынша, былтыр қарашада басталған байқауға қатысушыларды іріктеу жұмысы осы жылдың ақпан айына дейін жүргізіледі. Жеңімпаздар Алғыс айту күні (1 наурыз) мерекесінің қарсаңында белгілі болады.
«Астана қаласындағы іскер әйелдер қауымдастығы «Жас қанаттар» ұйымының көшбасшысы Әсел Қапалова лауреаттар бес аталым бойынша анықталатынын жеткізді. Атап айтқанда, салт-дәстүрге байланысты қайырымдылық қызмет көрсеткен адамдарға қолдау көрсетуге бағытталған «Асар» аталымы, білім беру, экология және көріктендіру саласында туған өлкеге көмек көрсететін жандарға тағайындалған «Туған жер» сыйлығы, тегін көмек көрсетіп, игі істер ақтарып жүрген жандарға арналған «Мейірім жолында» аталымы бар. Сондай-ақ ерлік жасап, жанкештілік танытқан батырларға берілетін «Батыл жүрек» және қайырымдылықты дәріптеген журналистер мен ұжымға берілетін «Қайырымдылық тарихы» аталымы да бар.
Майгүл СҰЛТАН,
«Egemen Qazaqstan»